2025 წელს ტურიზმიდან შემოსავლები 4.7 მილიარდ დოლარამდე გაიზარდა და მისი წილი მთლიან შიდა პროდუქტში 7%-ს აღემატებოდა. თუმცა რეალური არაპირდაპირი სარგებელი ქვეყანაში ჩამოსული უცხოელი ვიზიტორების გაცილებით დიდია და Galt&Taggart;-ის შეფასებით, მისი კონტრიბუცია ეკონომიკაში 14% -ს აღწევს.

რაც შეეხება ქვეყნების მიხედვით მიღებულ შემოსავლებს, 18%-იანი კლების მიუხედავად, შარშან ყველაზე მეტი 694 მლნ დოლარი ისევ რუსებმა დახარჯეს. მცირედი კლებაა თურქეთიდან და ხარჯები 606 მლნ დოლარს შეადგენს, 34%-იანი ზრდაა ისრაელელი ვიზიტორების ხარჯებში და 586 მლნ დოლარია, 33%-იანი ზრდა ფიქსირდება აზერბაიჯანთან და 223 მლნ დოლარს შეადგენს. სომხეთიდან დანახარჯები კი 8%-ით გაიზარდა და 169 მლნ დოლარია.

როგორც წესი, უფრო მეტს ხარჯავენ ევროკავშირიდან ჩამოსული ტურისტები, მაგრამ იმის მიუხედავად რომ შემოსავლები იზრდება, წილი დაბალია. ასე მაგალითად შარშან ევროკავშირიდან შემოსული ტურისტების დანახარჯები წლიურად 16%-ით 660 მლნ დოლარამდე გაიზარდა. რაც ნიშნავს, რომ ვიზიტზე საშუალო ხარჯი დაახლოებით 1321 დოლარი იყო.

შედარებით ახალია ჩინელი და ინდოელი ტურისტები. 2025 წელს ჩინეთიდან საქართველოში სულ 128 ათასი ვიზიტი შედგა, წლიური ზრდა 44%-ს უტოლდებოდა. საქსტატის მიერ BMG-ისთვის მოწოდებული ინფორმაციის მიხედვით, ჩინეთიდან ჩამოსულმა ვიზიტორებმა შარშან ჯამში 220 მლნ ლარი დახარჯეს, ეს ნიშნავს, რომ ვიზიტზე საშუალო ხარჯი 1 718 ლარის ფარგლებში იყო.

ქართული ტურიზმისთვის ჩინეთთან ერთად ერთ-ერთი ყველაზე მზარდი ბაზარი ინდოეთია. 2025 წელს ინდოეთიდან ჯამში 142.5 ვიზიტი შედგა, წლიურად ზრდა 15%-ია. ინდოეთიდან ჩამოსულმა ვიზიტორებმა ჯამში 290 მლნ ლარი დახარჯეს, რაც ნიშნავს, რომ ვიზიტზე საშუალო ხარჯი 2,034.5 ლარი იყო.

საქსტატის მიერ BMG-ისთვის გამოგზავნილი სტატისტიკა აჩვენებს, რომ 2024 წელთან შედარებით როგორც ჩინელი, ისე ინდოელი ვიზიტორების დანახარჯები შემცირებულია. თუ 2024 წელს ვიზიტზე საშუალო ხარჯი ჩინეთის შემთხვევაში 2,917.9 ლარი იყო, შარშან 1,718.4 ლარამდე შემცირდა. ინდოეთის შემთხვევაში კი ხარჯები 3,733 ლარიდან 2,034.5 ლარამდე კლებას აჩვენებს.

სტუმარი: თათია მამრიკიშვილი

#ახალიამბები #BusinessMediaGeorgia