დიდი სლემის 18-გზის გამარჯვებული ჩეხური წარმოშობის ამერიკელი ჩოგბურთელი მარტინა ნავრატილოვა დაქორწინებულა. BBC-ის ცნობით, ვეტერანმა ჩოგბურთელმა თავისი მომავალი ”მის სსრკ”-ს (1990), საბჭოთა არმიის პოლკოვნიკის ქალიშვილ იულია ლემიგოვას დაუკავშირა.

BBC იმასაც გვახსენებს, რომ 58 წლის ნავრატილოვამ 42 წლის ლემიგოვას წლეულს სექტემბერში აშშ-ის ღია პირველობაზე სთხოვა ხელი. მაშინ ყველაფრის მომგებმა ნავრატილოვამ ასეთი ნაბიჯი იმით განმარტა, რომ სურდა მისი ბედნიერების მოწმე მილიონობით ადამიანი გამხდარიყო.

ქალბატონების რომანზე პირველი ინფორმაცია 2009 წელს გავრცელდა.

ისიც ვთქვათ, რომ მარტინა აქტიურად იბრძვის სექსუალურ უმცირესობათა უფლებებისთვის. სოჭის ზამთრის ოლიმპიური თამაშების წინ ნავრატილოვამ საერთაშორისო ოლიმპიური კომიტეტს ბრალი დასდო სექსუალურ უმცირესობათა უფლებების დაცვის იგნორირებაში. მოგვიანებით ფიფასაც შეუტია 2022 წლის მსოფლიო ჩემპიონატის ყატარში ჩატარების გადაწყვეტილებისთვის, სადაც გეებზე სისხლის სამართლის დევნაა გამოცხადებული.