2026 წლის 1-ლი მაისიდან 26 ივლისის ჩათვლით პერიოდში, საქართველოდან ექსპორტირებულია 9.6 ათასი ტონა მოცვი. გარემოს დაცვისა და სოფლის მეურნეობის სამინისტროს ინფორმაციით, საანგარიშო პერიოდში ექსპორტირებული პროდუქტის საერთო ღირებულება 61.8 მლნ აშშ დოლარი იყო. უწყების ცნობითვე, წინა წლის ანალოგიურ პერიოდთან შედარებით, ექსპორტირებული მოცვის რაოდენობა 53%-ით (3.3 ათასი ტონა), ხოლო ღირებულება 46%-ით (19.5 მლნ აშშ დოლარი) გაიზარდა.

სამინისტროს მიერ გავრცელებული მონაცემების თანახმად, აღნიშნულ პერიოდში 1 კგ მოცვის საშუალო საექსპორტო ფასი 6.4 დოლარია. აღსანიშნავია, რომ მაისი-ივლისის პერიოდში საქართველოდან ექსპორტირებული მოცვის 91% რუსეთში გავიდა. მცირე რაოდენობით მოცვის ექსპორტი ფიქსირდება ასევე: სომხეთში, თურქეთში, არაბთა გაერთიანებულ საამიროებსა და სხვა ქვეყნებში. სექტორის მთავარი პრობლემებიც სწორედ რუსეთის ბაზარზე დამოკიდებულებას, სამაცივრე ინფრასტრუქტურის დეფიციტს და ამის გამო ფასების მკვეთრ ვარდნას უკავშირდება. წელს მოცვის რეკორდულ, დაახლოებით 10 000-ტონიან მოსავალს ელოდებიან, თუმცა სეზონი მწარმოებლებისთვის ერთ-ერთი ყველაზე რთულია.

არანორმალურმა ამინდებმა – დაბალმა ტემპერატურამ, გადაუღებელმა წვიმებმა და სეტყვამ – მოსავლის ხარისხი მნიშვნელოვნად გააუარესა. მოცვის კვებითი ღირებულება შენარჩუნდა, მაგრამ დაზიანდა პრემიუმ ხარისხისა და ექსპორტისთვის მნიშვნელოვანი ვიზუალური მახასიათებლები.


სტუმარი: ეკატერინე ვეფხვაძე - Agritouch-ის დამფუძნებელი;

#ახალიამბები #BusinessMediaGeorgia