საქართველოში აგრარული და სასაწყობე ხელწერილების რეფორმის განხორციელება იგეგმება. შესაბამისი ინიციატივა პარლამენტში წარდგენილ მთავრობის საკანონმდებლო პროექტების გეგმაშია, რომლის წარდგენაც მიმდინარე საშემოდგომო სესიაზე იგეგმება. როგორც დოკუმენტშია ნათქვამი, საკანონმდებლო ცვლილებების მიხედვით, აგრომეწარმეებსა და ბაზრის სხვა მონაწილეებს საშუალება ექნებათ, დაფინანსების უზრუნველყოფის ინსტრუმენტად სამომავლო მოსავალი ან რეგისტრირებულ საწყობში განთავსებული საქონელი გამოიყენონ. ახალი ჩარჩო განსაზღვრავს აგრარული და სასაწყობე ხელწერილების სამართლებრივ სტატუსს, მათი გამოშვებისა და რეგისტრაციის წესებს, აგრეთვე აგროფერმერის, საწყობის ოპერატორების, კრედიტორებისა და სხვა მონაწილეების უფლებებსა და ვალდებულებებს. „გრძელვადიან პერსპექტივაში აღნიშნული მექანიზმი ხელს შეუწყობს სასაქონლო ბაზრებისა და ბირჟების ჩამოყალიბებას, მათ შორის ინფრასტრუქტურისა და ფასების ფორმირების პროცესის განვითარებას“, - ნათქვამია კანონშემოქმედებითი საქმიანობის მოკლევადიან გეგმაში. რას შეცვლის აგრარული და სასაწყობე ხელწერილების რეფორმა და რამდენად ქმედითი შეიძლება იყოს ფერმერებისთვის დაფინანსების ახალი ინსტრუმენტი?

სტუმარი: გოჩა ცოფურაშვილი - ეკონომიკის დოქტორი

#ახალიამბები #BusinessMediaGeorgia