“ ინტერ რაოს” სანქცირების მიუხედავად ბანკები გააგრძელებენ „თელასის“ მომსახურებას ეროვნულ ვალუტაში”- ეროვნული ბანკი ევროკავშირის მიერ რუსეთის წინააღმდეგ დაწესებული სანქციების 21-ე პაკეტის ფარგლებში კომპანია Inter RAO-ს მიმართ სანქციების გავრცელების საკითხს ეხმაურება და განმარტავს, რომ აღნიშნული კომპანია წარმოადგენს სს „თელასის“ არაპირდაპირ მფლობელს.
ამასთან, თავად სს „თელასი“ არ არის შეყვანილი სანქცირებულ პირთა სიაში და წარმოადგენს კრიტიკული მნიშვნელობის მქონე მომსახურების მიმწოდებელ კომპანიას, რომლის შეუფერხებელი ფუნქციონირება აუცილებელია მოსახლეობისა და ეკონომიკისთვის. საერთაშორისო სანქციების მოთხოვნების გათვალისწინებით, საქართველოს ეროვნული ბანკი, მისი კომპეტენციის ფარგლებში, უზრუნველყოფს შესაბამისი მიდგომების გამოყენებას, რათა, ერთი მხრივ, დაცული იყოს სანქციების მოთხოვნები, ხოლო, მეორე მხრივ, გათვალისწინებული იქნეს კრიტიკული მნიშვნელობის მქონე მომსახურებების უწყვეტობა. ამასთან, სანქციებთან დაკავშირებული საკითხების შეფასებისას მხედველობაში მიიღება კონკრეტული გარემოებები, მათ შორის განსახორციელებელი ოპერაციების ხასიათი და მიზანი. “შესაბამისად, ბანკები გააგრძელებენ სს „თელასის“ მომსახურებას ეროვნულ ვალუტაში, მოქმედი სანქციების მოთხოვნების, სებ-ის რეგულაციების, საკუთარი პოლიტიკისა და ასევე რისკის შეფასების მიდგომების შესაბამისად”-ნათქვამია სების განცხადებაში. ეს განცხადება ეროვნულმა ბანკმა რამდენიმე წუთის წინ გაავრცელა, მანამდე ჩვენი გუნდი დილიდან ცდილობდა ამ საკითხზე შეფასებები მოესმინა. სპეციალისტები ბიემჯისთან განმარტავენ, რომ სტრატეგიულ ენერგეტიკულ ობიექტებზე სანქციების რისკის შესამცირებლად, სახელმწიფოს ჩართულობა აუცილებელია. რისკები და კითხვის ნიშნები ენერგეტიკულ უსაფრთხოებასა და რეპუტაციულ დაცულობაზე მას შემდეგ გაჩნდა, რაც ევროკავშირმა რუსული ენერგოგიგანტი „ინტერ რაო“ დაასანქცირა, რომლის მფლობელობაშიც საქართველოში „თელასის“ უდიდესი ნაწილი და „ხრამჰესის“ ელექტროსადგურები შედის. რა გავლენას მოახდეს რუსული ინტერ რაოს სანქცირება საქართველოზე და ქვეყნის ენერგეტიკულ უსაფრთხოებაზე.

#ახალიამბები #BusinessMediaGeorgia