ზაფხულის აქტიური ტურისტული სეზონის პიკისთვის მზადების ფარგლებში, ბათუმის საერთაშორისო აეროპორტში გაფართოების სამუშაოები აქტიურ ფაზაშია. ტავ ჯორჯიას გენერალურმა მენეჯერმა თეა ზაქარაძემ სამუშაოები დღეს ეკონომიკის მინისტრს მარიამ ქვრივიშვილს ადგილზე გააცნო. საინვესტიციო პროექტის ფარგლებში ბათუმის საერთაშორისო აეროპორტის ტერმინალის არსებულ 8,000 მ²-ს დაახლოებით 1000 მ² ფართობის ახალი სივრცეები ემატება, რომელიც მოიცავს, როგორც საოპერაციო ასევე ადმინისტრაციულ ზონებს - სხვადასხვა ზონაში მიმდინარე და განხორციელებული სამუშაოები აეროპორტის გამტარუნარიანობას ჯამში 22-25%-მდე ზრდის. ამასთან, 14-დან 18-მდე იზრდება სარეგისტრაციო ზონაში არსებული დახლების რაოდენობა, საპასპორტო შემოწმების ჯიხურების რაოდენობა კი, 5-მდე იზრდება, რაც საერთო ჯამში გასასვლელების რაოდენობას 8-დან 10-მდე გაზრდის. “ტავ ჯორჯიას” ცნობით, უკვე დასრულებულია Duty Free ზონის გაფართოების სამუშაოები. ტერმინალის მომიჯნავე შენობაში კი,, 450 მ2 ფართობზე ასევე დასრულდა ადმინისტრაციული ოფისების სრული რეაბილიტაცია და აღჭურვა. პროექტის ფარგლებში მოხდება საბარგო კარუსელების დაგრძელება და მოდერნიზება.


#ახალიამბები #BusinessMediaGeorgia