აქტივების სიდიდით მეოთხე "ბაზისბანკმა" მესამე უმსხვილესი - "ლიბერთი ბანკი" შეიძინა. გარიგება მოიცავს ბიზნესმენ ირაკლი რუხაძის Hunnewel Partners-სგან აქციათა საკონტროლო-96%-ის წილის გამოსყიდვას. ტრანზაქციის ღირებულება კონფიდენციალურია. ეროვნულმა ბანკმა ჯერ კიდევ 2025 წლის ზაფხულში დაასრულა აღნიშნული გარიგების კვლევა და დაასკვნა, რომ გაერთიანება ქვეყნის საბანკო სისტემაში არსებული კონკურენციის დონეზე ნეგატიურ გავლენას არ მოახდენდა. შერწყმის შემდეგ გაერთიანებული ბანკის პარამეტრები აქტივების ზომით იქნება 11.18 მილიარდი ლარი, რაც საბანკო სისტემის 10.53%-ია. საკრედიტო პორტფელი 8 მილიარდი ლარი, რაც სისტემის 10.9%-ია, ხოლო სადეპოზიტო პორტფელი კი ასევე 8 მილიარდი ლარი, რაც საბანკო სისტემის 11.5%-ია. საქართველოში მესამე ყველაზე მსხვილი ბანკი ყალიბდება. ბაზის ბანკის მიერ ლიბერთის ყიდვის შემდეგ, საბანკო სისტემის 10%-ზე მეტი ჩინურ ბანკზე მოდის. რაშიც პირადად მე, ცუდს ვერაფერს ვხედავ. მართალია ტრანზაქციის ღირებულება კონფიდენციალურია, თუმცა ცალსახაა, რომ ირაკლი რუხაძის მიერ სიმბოლურ ფასად დათმობილი “იმედის” შემდეგ, მნიშვნელოვან გარიგებასთან გაქვს საქმე. ჩემი ინფორმაციით, გარიგება არ და ვერ იქნებოდა 400 მლნ დოლარზე ნაკლები, გათვალისწინებით ბანკის აქტივ-პასივებისა, და მომგებიანობისა. დანარჩენი გამოჩნდება, ჩინეთშიც კი ასეთი ტიპის გარიგებები არის სრულიად საჯარო. თუმცა, შევეშვათ ამ მომენტისთვის კაპიტალის კუთვნილებას და ვნახოთ, თუ როგორ გადანაწილდება წილები ქართულ საფინანსო სექტორში, რა ბედი ელის ლიბერთი ბანკის მილიონზე მეტ მომხმარებელს და რა გავლენა ექნება ამ გარიგებას საქართველოს ეკონომიკისთვის უმნიშვნელოვანეს საფინანსო სექტორზე.

#ახალიამბები #BusinessMediaGeorgia