პირველი დეკემბრიდან პოლონეთი საქართველოს მოქალაქეებისთვის გამარტივებული წესით სამუშაო ვიზების ე.წ. "განცხადების საფუძველზე დასაქმების" მექანიზმით აუქმებს. ახალი წესების თანახმად, გამარტივებული პროცედურები რჩება სომხეთის, ბელარუსის, მოლდოვას და უკრაინის მოქალაქეებისთვის, თუმცა სიაში არ არის საქართველო. ახალი რეგულაცია საქართველოს მოქალაქეებისთვის გარკვეულ გამონაკლისს ითვალისწინებს. კერძოდ, საქართველოს მოქალაქეებს, რომლებსაც სამუშაო მინდობილი აქვთ წინამდებარე რეგულაციის ძალაში შესვლამდე, შეუძლიათ გააგრძელონ მუშაობა ამ განცხადების მოქმედების ვადის ამოწურვამდე. ასევე იმ პროცედურებზე, რომლებიც დაწყებული იყო და არ არის დასრულებული რეგულაციის ძალაში შესვლამდე, გავრცელდება ძველი რეგულაციის ნორმები.

2024 წლის სტატისტიკის მიხედვით, პოლონეთში საქართველოს მოქალაქეებზე 76 671 სამუშაო ნებართვა გაიცა, რომელთა რაოდენობიდან გამომდინარე ჩანს, რომ ზოგიერთი პირი წლის განმავლობაში მუშაობას სხვადასხვა ორგანიზაციაში ეწეოდა და ნებართვას რამდენჯერმე იღებდა. ჯამში 2024 წელს 6 560 დამსაქმებელი/ორგანიზაცია აღირიცხა, რომლებმაც 47 086 საქართველოს მოქალაქე დაასაქმეს.
პოლონეთში ქართველების დასაქმების გამარტივებული პროცედურა 2015 წელს დამტკიცდა. მაშინ პოლონეთის შრომისა და სოციალური პოლიტიკის მინისტრის განკარგულებით, სომხეთის, ბელარუსის, საქართველოს, მოლდოვის და უკრაინის მოქალაქეებს სამუშაო ვიზის მიღების გამარტივებული მექანიზმი შექმნა. მექანიზმი დარჩა ყველა ქვეყნისთვის, გარდა საქართველოსი.

#ახალიამბები #BusinessMediaGeorgia