თუ საქართველოს მთავრობას სავალუტო ფონდთან ახალი პროგრამის დაწყების ინტერესი ექნება, ჩვენ მზად ვართ განვიხილოთ ეს მოთხოვნა - ასე პასუხობს imf კითხვას, სჭირდება თუ არა საქართველოს ახალი პროგრამა. ფონდში განმარტავენ, რომ საქართველო ტექნიკური დახმარების პროექტების ერთ-ერთი მსხვილი ბენეფიციარია, თუმცა რაც შეეხება ახალი პროგრამის დაწყების შესაძლებლობის განხილვას, ეს საქართველოს მთავრობის ინტერესზეა დამოკიდებული. თავად საქართველოს მთავრობას კი ამ დრომდე IMF-ისგან ახალი პროგრამა არ მოუთხოვია, რის არგუმენტადაც ფინანსთა მინისტრის მოადგილე ამბობს, რომ ამ მიმართულებით კონკრეტული საჭიროება არ გამოკვეთილა. ეკონომისტების ნაწილი კი ვარაუდობს, რომ საქართველოს ხელისუფლება კვლავ არაა მზად რეალურად გაატაროს სხვადასხვა მიმართულებით რეფორმები და იმ ფისკალურ ჩარჩოებში მოექცეს, რომელსაც პროგრამის ფარგლებში IMF ითხოვს.


#ახალიამბები #BusinessMediaGeorgia