სასამართლო დავების განხილვის გაჭიანურება რომ აქტუალური პრობლემაა, ამაზე კერძო სექტორი დიდი ხანია, საუბრობს. BMG-სთან ინტერვიუში იურისტები აღნიშნავენ, რომ მოსამართლეთა არასაკმარისი რაოდენობის გამო საქმეთა გონივრულ ვადაში განხილვა ვერ ხერხდება. თუმცა ორგანიზაცია “დემოკრატიის ინდექსი - საქართველოს” კვლევის თანახმად, მოსამართლეთა რაოდენობის ზრდა აღნიშნული პრობლემის გადაჭრის ერთადერთი გზა არ არის. სასამართლოში საქმეების მათ შორის, ბიზნეს დავების განხილვის გაჭიანურება უკვე დიდი ხნის პრობლემაა, რომელსაც დრო ვერაფერს აკლებს. როგორც იურისტები გვეუბნებიან, აქვთ შემთხვევები, როცა ქართულ სასამართლო სისტემაში საქმეები ხუთი და მეტი წელი მიმდინარეობს. ყველა თანხმდება, რომ არსებული ვითარება ქვეყნის საინვესტიციო გარემოს აზიანებს, რომლისთვისაც დამოუკიდებელი და ეფექტიანი სასამართლო კრიტიკული მნიშვნელობისაა.

#ახალიამბები #BusinessMediaGeorgia