კონკურენციის სააგენტო აგროქიმიკატებისა და პესტიციდების ბაზარზე მოკვლევის დაწყებას არ გამორიცხავს. ამჟამად, სააგენტო ამ ბაზარს მონიტორინგის რეჟიმში აკვირდება. მონიტორინგის შუალედურ ანგარიშში კი ბაზარზე არსებულ დომინანტურ მდგომარეობებზე, მაღალ ფასნამატებსა და ინტერესთა შესაძლო კონფლიქტზეა საუბარი. ანგარიშის თანახმად, 2022-2025 წლებში, გამოვლინდა 75 შემთხვევა, როდესაც აგროქიმიკატების იმპორტის დონიდან საცალო დონემდე ფასნამატი 100%-ს აღემატებოდა. პესტიციდების შემთხვევაში კი ასეთი 86 შემთხვევა აღირიცხა. სააგენტოს შეფასებით, ბაზარზე, მნიშვნელოვანი საბაზრო ძალაუფლებით ხასიათდება ბაზრის საცალო დონე. სააგენტოს დასკვნებს არ ეთანხმება აგროქიმიკატებისა და პესტიციდების რეალიზაციის სექტორი. მათი ნაწილის შეფასებით, ბაზარი საკმაოდ მაღალკონკურენტულია და ფასწარმოქმნაში ჩარევა სექტორს ჩამოშლის პირას მიიყვანს. პესტიციდების ბაზრის შესწავლის რეკომენდაცია მთავრობამ სურსათის, საწვავისა და მედიკამენტების ფასების შემდეგ გასცა. რა ვითარებაა დარგში და რა პროცესებია მოსალოდნელი აგროქიმიკატების ბაზარზე?


#ახალიამბები #BusinessMediaGeorgia