ფორმალურად ქცეული კანდიდატის სტატუსი, დემოკრატიის უკუსვლა, კანონის უზენაესობის სწრაფი გაუარესება და ფუნდამენტური უფლებების სერიოზული შეზღუდვა - ეს ნაწილია ევროკომისართა იმ საკმაოდ მწვავე შეფასებების, რომელიც გუშინ საქართველოსთან მიმართებაში ევროკომისიის ანგარიშის გამოქვეყნებას მოჰყვა. დოკუმენტის მნიშვნელოვანი ნაწილი საქართველოში დემოკრატიული ვითარების გაუარესებას ეთმობა და მასში აღნიშნულია, რომ როგორც ჯერ კიდევ 2024 წლის დეკემბერში ევროპულმა საბჭომ დაასკვნა, საქართველოს EU-ში გაწევრიანების პროცესი "დე ფაქტო გაჩერებულია", ხოლო 2025 წელს დამატებით დემოკრატიის თვალსაზრისით საქართველოში "მნიშვნელოვანი უკუსვლა" ფიქსირდება და საქართველო კანდიდატის სტატუსის მხოლოდ "სახელწოდებას" ინარჩუნებს. დოკუმენტში ასევე შეფასებულია საქართველოს მაკროეკონომიკური პოლიტიკა, პოლიტიკური პროცესების გავლენა საინვესტიციო გარემოზე და ინსტიტუციების სუსტი მხარეები. ანგარიშში კრიტიკულ შეფასებებთან ერთად ვხვდებით შედარებით პოზიტიურ გზავნილებსაც. ევროკომისია მიიჩნევს, რომ საქართველოს მაკროეკონომიკურ პოლიტიკა მთლიანობაში შესაბამისობაშია საბაზრო მოთხოვნებთან.


#ახალიამბები #BusinessMediaGeorgia