მთავრობა სამშენებლო სექტორში დასაქმებულთა შეღავათის გაუქმებას და ამ გზით ₾200 მლნ-ის ამოღებას ითხოვს - საქართველოს პარლამენტის საფინანსო-საბიუჯეტო კომიტეტი ფინანსთა სამინისტროს მიერ წარდგენილ ინიციატივას განიხილავს, რომელიც მეტწილად აუქმებს სამშენებლო სექტორში მცირე მეწარმეებისთვის არსებულ საგადასახადო შეღავათს. საუბარია შეღავათზე, რომელიც მცირე მეწარმეებისთვის შესაძლებელს ხდის დაიბეგრონ მხოლოდ 1%-ით.

ფინანსთა მინისტრის მოადგილეს, მამუკა ბარათაშვილის განცხადებით, ამ ცვლილების შედეგად ბიუჯეტში 200 მილიონი ლარის გადასახადები შევა და ის 2025 წლის 1 იანვრიდან უნდა ამოქმედდეს.

საქმე ეხება მშენებლობის სექტორში მცირე მეწარმის სტატუსს, ფინანსთა სამინისტროს განმარტებით, ამ სტატუსს ანიჭებენ კომპანიაში დასაქმებულ მუშებს, რომლებიც არა დაქირავების ხელშეკრულებით, არამედ სერვისის მიწოდების ხელშეკრულებით მუშაობენ და აწვდიან სერვისს კომპანიებს და შედეგად 20%-ის ნაცვლად 1%-ით იბეგრებიან.

მამუკა ბარათაშვილის თქმით, კომპანიები მუშებს სისტემურად არეგსტრირებენ მცირე მეწარმეებად, რათა არ გადაიხადონ საშემოსავლო გადასახადი და მის ნაცვლად მხოლოდ 1%-იანი დაბეგვრით ისარგებლონ, რასთან დაკავშირებითაც შემოსავლების სამსახურს უკვე არაერთი დავა აქვს დაწყებული.

მისივე განცხადებით სამშენებლო სექტორში მცირე მეწარმის სტატუსის მქონე პირები 1%-ის ნაცვლად 20%-ით დაიბეგრებიან ნებისმიერ ხელშეკრულებაში, რომელთაც გააფორმებენ კომპანიებთან და მეწარმე იურიდიულ პირებთან, მათთვის შეღავათი შენარჩუნდება მხოლოდ მაშინ თუკი კონტრაქტს გააფორმებენ სხვა ფიზიკურ პირთან, რომელიც მეწარმის სტატუსს არ ატარებს.

ფინანსთა სამინისტროს მიერ მომზადებული პროექტის მიხედვით ცვლილება უნდა შევიდეს სპეციალური დაბეგვრის შესახებ ფინანსთა მინისტრის ბრძანებაში, რასაც პარლამენტის საფინანსო-საბიუჯეტო კომიტეტის თანხმობა ესაჭიროება.

სტუმარი: ბექა თეზელაშვილი - იურისტი;

#ახალიამბები #BusinessMediaGeorgia