29-30 ივლისს საქართველოს საბანკო ასოციაციამ გარემოსდაცვით, სოციალურ და მმართველობით (ESG) საკითხებზე სასწავლო ვიზიტის ფარგლებში აზერბაიჯანის კომერციული ბანკების წარმომადგენლებს უმასპინძლა. ღონისძიება საქართველოსა და აზერბაიჯანის საბანკო ასოციაციების თანამშრომლობით გაიმართა და საერთაშორისო საფინანსო კორპორაციის, შვეიცარიის ეკონომიკურ საკითხებში სახელმწიფო სამდივნოს, ავსტრიის ფედერალურ ფინანსთა სამინისტროს და საინვესტიციო კლიმატის საკონსულტაციო სერვისების დაწესებულების მხარდაჭერით ჩატარდა. ღონისძიების პირველ დღეს, საქართველოს საბანკო ასოციაციის და სამი კომერციული ბანკის - საქართველოს ბანკის, თიბისის და პროკრედიტ ბანკი საქართველოს წარმომადგენლებმა, აზერბაიჯანის 12 კომერციულ ბანკს საქართველოს საბანკო სექტორში ESG და მდგრადი დაფინანსების პრაქტიკები გააცნეს. რაც შეეხება ღონისძიების მეორე დღეს, საქართველოსა და აზერბაიჯანის საბანკო ასოციაციების წევრი ბანკებისთვის, საერთაშორისო საფინანსო კორპორაციის (IFC) მოწვეულმა ექსპერტმა წარმართა დისკუსია თემაზე - მდგრადი ტრანსფორმაცია საფინანსო ინსტიტუტებისთვის.


#ახალიამბები #BusinessMediaGeorgia