მსოფლიო ბანკმა გლობალური ეკონომიკის პერსპექტივების შესახებ ანგარიში გამოაქვეყნა, რომლის მიხედვითაც მიმდინარე ათწლეული განვითარების მიმართულებით გარდამტეხი უნდა ყოფილიყო, თუმცა პროგნოზების მიხედვით, 2024 წლის ბოლოსთვის მსოფლიო ეკონომიკა ანტირეკორდს დაამყარებს - გლობალური მთლიანი შიდა პროდუქტის ზრდის ტემპი ამ ათწლეულის პირველ ნახევარში ბოლო 30 წლის განმავლობაში ყველაზე დაბალი იქნება.

ამ ფონზე, მსოფლიო ბანკის პროგნოზით წელს საქართველოს ეკონომიკა 4.8%-ით გაიზრდება. 2023 წლის პროგნოზთან შედარებით, ეს მაჩვენებელი 0.7 პროცენტული პუნქტით არის შემცირებული.

ზრდის მოსალოდნელი შენელება რამდენიმე ფაქტორს, მათ შორის მიგრაციული ეკონომიკური ბუსტის შემცირებას უკავშირდება. საგულისხმოა რომ 2021-2022 წლებში საქართველოს ორნიშნა ეკონომიკური ზრდა ჰქონდა - 10.5% და 10.4%, 2023 წელს კი ზრდის ტემპი 6.5%-მდე შემცირდა, რაც მათ შორის მაღალი საბაზო ეფექტით იყო განპირობებული.

საქართველოს მთავრობის პროგნოზი მსოფლიო ბანკის მოლოდინზე უფრო ოპტიმისტურია. საქართველოს მთავრობა 2024 წელს ქვეყანაში 5.2%-იან ეკონომიკურ ზრდას ელოდება, შესაბამისად, მიმდინარე წლის ბიუჯეტიც ამ მაჩვენებელზე არის დაგეგმილი.

სტუმარი: სოსო ბერიკაშვილი - "კავკასიის უნივერსიტეტის" ეკონომიკის სკოლის დეკანი;

#საქმიანიდილა-ს #ანალიტიკა ელენე კვანჭილაშვილთან ერთად

#ახალიამბები #BusinessMediaGeorgia