დაავადებათა კონტროლის ეროვნული ცენტრი თბილისის საბავშვო ბაღებში დაფიქსირებულ მასობრივ ავადობაზე ინფორმაციას ავრცელებს. უწყების ცნობით, ჩატარებული ლაბორატორიული კვლევების შედეგები მიუთითებს, რომ გასტროენტერიტით მიმდინარე შემთხვევების ძირითადი უმრავლესობის გამომწვევი, მაღალი ალბათობით, „ნოროვირუსი“ იყო.

NCDC-ის განმარტებით, ნოროვირუსი საკმაოდ ფართოდ გავრცელებული ვირუსული ინფექციაა, რომელიც ახასიათებს მაღალი გადამდებლობა და სწრაფი გავრცელება, განსაკუთრებით ისეთ დახურულ კოლექტივებში, როგორიც საბავშვო ბაღებია. შეგახსენებთ, რომ თბილისის რამდენიმე საბავშვო ბაგა-ბაღში აღსაზრდელების სავარაუდო ინტოქსიკაციის ფაქტები დაფიქსირდა. არსებული ინფორმაციით, ათობით ბავშვს ინტოქსიკაციისთვის დამახასიათებელი სიმპტომები აღენიშნებოდა, რის გამოც ნაწილს სამედიცინო დახმარება კლინიკებში დასჭირდა. შექმნილ ვითარებასთან დაკავშირებით მოკვლევა უკვე დაიწყო სურსათის ეროვნულმა სააგენტომ და ბაგა-ბაღების მართვის სააგენტომ.

მომხდარს თბილისის მერი, კახა კალაძეც გამოეხმაურა. მისი განცხადებით, პროცესი სრულიად გამჭვირვალეა და საზოგადოება დეტალურ ინფორმაციას კვლევის შედეგების მიღებისთანავე შეიტყობს.

პარალელურად, ეპიდემიოლოგები და ექიმები აცხადებენ, რომ აუცილებელია ვირუსის გავრცელების ზუსტი წყაროს დადგენა. სპეციალისტები მშობლებსა და ბაღების პერსონალს ჰიგიენური ნორმების მკაცრი დაცვისკენ მოუწოდებენ.

სტუმარი: გიორგი კამკამიძე - კლინიკა “ნეოლაბის” დირექტორი, ალერგოლოგ-იმუნოლოგი

#ახალიამბები #BusinessMediaGeorgia