ბიზნესისა და ტექნოლოგიების უნივერსიტეტმა ქართული ცოდნის მასშტაბური ციფრული ბანკი შექმნა. პროექტის მთავარი მიზანია, ხელოვნურმა ინტელექტმა და სხვა თანამედროვე ტექნოლოგიებმა საქართველოს ეკონომიკური, სოციალური და კულტურული კონტექსტი სიღრმისეულად გააანალიზონ. ეს უპრეცედენტო ციფრული საცავი უკვე აერთიანებს 7 მილიარდამდე ტოკენის მოცულობის ქართულენოვან რესურსს და 1 მილიონამდე კვლევით შედეგს. ბაზაში თავმოყრილია სამეცნიერო პუბლიკაციები, ბიზნესლიტერატურა, სტატისტიკური მონაცემები, საგანმანათლებლო რესურსები და გაციფრულებული საარქივო მასალები. მონაცემთა მსგავსი მოცულობა ხელოვნურ ინტელექტს საშუალებას აძლევს, საქართველოს შესახებ ინფორმაცია არა ზედაპირულად, არამედ ზუსტი სოციალურ-ეკონომიკური სპეციფიკის გათვალისწინებით აღიქვას. შესაბამისად, AI მოდელები შეძლებენ, ქართულ რეალობაზე მორგებული, გაცილებით ზუსტი და პრაქტიკული პასუხები დააგენერირონ. შედეგად, მომავალი AI აგენტები, ციფრული ასისტენტები და ანალიტიკური სისტემები ბევრად უფრო ეფექტურად იმუშავებენ განათლების, ბიზნესის, მედიისა თუ საჯარო სერვისების მიმართულებით.


#ახალიამბები #BusinessMediaGeorgia