საქართველოს ეროვნულმა ბანკმა საერთაშორისო რეზერვებისთვის დამატებით 100 მილიონი დოლარის ღირებულების მონეტარული ოქრო შეიძინა. შედეგად, სებ-ის ოქროს რეზერვები თითქმის 7.9 ტონამდე გაიზარდა და საერთაშორისო რეზერვებში მისმა წილმა 15.5%-ს მიაღწია. ეროვნული ბანკის განმარტებით, გადაწყვეტილების მიზანია რეზერვების დივერსიფიკაცია, ინფლაციური და გეოპოლიტიკური რისკებისგან დაცვა და ფინანსური სტაბილურობის გაძლიერება.

„ საერთაშორისო ბაზრებზე ცენტრალური ბანკები კვლავ განაგრძობენ ოქროს შესყიდვის
მიღებულ პრაქტიკას და მხოლოდ 2026 პირველ კვარტალში 970 ტონაზე მეტი შეისყიდეს, რაც მთელ 2025 წლის შესყიდვებთან მიმართებაში დაახლოებით 80%-ია. ცენტრალური ბანკების მთლიანი შესყიდვები ზედიზედ ოთხი წლის განმავლობაში 1000 ტონაზე მაღალ ნიშნულზე ნარჩუნდება.

აღსანიშნავია, ისიც, რომ ცენტრალური ბანკების მხრიდან მოთხოვნა ოქროს ფასზე ნაკლებად არის დამოკიდებული, რაც ძირითადად ოქროს ფასის ქვედა ზღვრის სტაბილურობას უზრუნველყოფს. უკრაინაში კონფლიქტის გაგრძელება, შუა აღმოსავლეთში ესკალაცია, აშშ-ის და ჩინეთის სავაჭრო დაძაბულობა, ასევე 2026 წლის თებერვალში დაწყებული აშშ-ის და ირანის კონფლიქტი - ყველა ეს ფაქტორი თანმიმდევრულად ქმნიდა და აძლიერებდა სტრუქტურულ რისკის პრემიას ოქროს ფასში და ზრდიდა მისი, როგორც უსაფრთხო და დაცული აქტივის ღირებულებას",- აღნიშნულია სებ-ის მიერ გავრცელებულ ინფორმაციაში.

ამასთან უნდა აღინიშნოს, რომ ეროვნული ბანკის პრეზიდენტმა, ნათია თურნავამ 27 მაისს პარლამენტში განაცხადა , რომ სებ-ი ოქროს ზრდას მთლიან რეზერვებში 25%-მდე წილით განიხილავდა. ეს კი ნიშნავს, რომ ახლა შესყიდული 100 მილიონი დოლარის ოქროს გარდა, მარეგულირებელი კიდევ აპირებს ოქროს შესყიდვას.

რამდენად სწორი და დროული გადაწყვეტილებაა ეროვნული ბანკის მხრიდან ოქროს რეზერვების გაზრდა?

სტუმარი: აკაკი ცომაია - ეკონომისტი

#ახალიამბები #BusinessMediaGeorgia