საქართველოში პირველი ტრანსკონტინენტური ტელერობოტული ოპერაცია ჩინეთიდან, 6000 კილომეტრის დაშორებით ჩატარდა. მარდალეიშვილის სამედიცინო ცენტრმა კავკასიის რეგიონში პირველი და გლობალური მასშტაბით ერთ-ერთი ყველაზე რთული ტელერობოტული ოპერაცია შეასრულა. შესაძლოა შემოგხვდათ კიდეც ინტერნეტ თუ სოციალურ ქსელებში ამბავი იმაზე როგორ დაიწერა ისტორია ნახევარი დედამიწის დისტანციიდან. ონკო-ქირურგმა ემზარ ნადირაძემ, რომელიც ჩინეთის ქალაქ უხანში იმყოფებოდა, 6000 კილომეტრის მოშორებიდან, თბილისის საოპერაციო ბლოკში მყოფ პაციენტს კოლორექტალური ქირურგიის ურთულესი პროცედურა—ულტრა დაბალი წინა რეზექცია ჩაუტარა.

ოპერაციამ 8 საათსა და 30 წუთს გასტანა.ოპერაციის ხანგრძლივობა განაპირობა მისმა სირთულემ და პაციენტის ანატომიურმა აგებულებამ და არა ოპერატორის პაციენტისგან ათასობით კილომეტრით დაშორებამ. მთელი ამ დროის განმავლობაში, ქართველი ქირურგი უხანიდან სრული კონცენტრაციით, უწყვეტად მართავდა თბილისში მყოფ რობოტს.ასეთი ხანგრძლივობისა და კლინიკური კრიტიკულობის ოპერაცია დისტანციურ ფორმატში მსოფლიო მედიცინის ისტორიაშიც კი თითზე ჩამოსათვლელია. საერთაშორისო პრაქტიკაში სხვადასხვა ქვეყნებს შორის ჩატარებული ტელეოპერაციები ძირითადად ხანმოკლე და მარტივი მანიპულაციებით შემოიფარგლება,მარდალეიშვილის კლინიკის შემთხვევამ კი აჩვენა, რომ ქირურგის მაღალი კვალიფიკაციით შესაძლებელია ყველაზე ხანგრძლივი და ანატომიურად ურთულესი სიმსივნეების დისტანციური მკურნალობაც.

სტუმრები: გიორგი ლოლაძე - მარდალეიშვილის სამედიცინო ცენტრის დირექტორი;

ემზარ ნადირაძე - მარდალეიშვილის სამედიცინო ცენტრის ქირურგიული დეპარტამენტის ხელმძღვანელი, ზოგადი ქირურგი

#ახალიამბები #BusinessMediaGeorgia