„რუსთავის აზოტის“ თანამშრომლები, რომლებიც კვირაზე მეტია ხელფასის გაზრდის მოთხოვნით საპროტესტო აქციებს მართავენ, კომპანიის მენეჯმენტთან კომუნიკაციის პროცესში რუსთავის მერის ნინო ლაცაბიძის ჩართვას ითხოვენ. ეს მიმართვა პროტესტის მონაწილეებმა გუშინ რუსთავის მერიასთან გამართულ აქციაზე გააჟღერეს.მათი ინფორმაციით, დღეისთვის კომპანია „რუსთავის აზოტის“ ქარხანაში გაჩერებულია როგორც სასუქების წარმოება, ასევე ჟანგბადის ბალონების მწარმოებელი ქარხნის მუშაობა. პროტესტის მონაწილეები აცხადებენ, რომ 3 თებერვალს „რუსთავის აზოტის“ ხელმძღვანელ პირებთან შეხვედრა უშედეგოდ დასრულდა და პროტესტის მონაწილეები ქალაქის ხელმძღვანელი პირების პროცესში ჩართვას მნიშვნელოვნად მიიჩნევენ.

„გუშინ „რუსთავის აზოტის“ ხელმძღვანელებს პირებს შევხვდით - ვციტირებ აქციის ერთ-ერთ მონაწილეს. გვქონდა შემდეგი სახის შეთავაზება ხელფასის 200-ლარიანი მატება, 25%-იანი პრემიების შეტანა, ტარიფების გადახედვა და ა.შ., რაზედაც ადმინისტრაციის მხრიდან მივიღეთ უარი.

მოვუწოდებთ ქალბატონ ნინოს (ლაცაბიძეს), ვთხოვო დახმარება, მოვიდეს აზოტის ქარხანაში და დაგვეხმაროს ადმინისტრაციასთან საუბარში. დაუყოვნებლივ უნდა გათავისუფლდეს კომპანიის დირექტორი ლევან ბურდილაძე სამსახურიდან. ვთხოვ, ქალბატონ ნინოს და ირაკლი შატაკიშვილს [„ქართული ოცნების“ დელეგატი ქალაქ რუსთავიდან XI მოწვევის პარლამენტში] დაგვეხმარონ ადმინისტრაციასთან მოლაპარაკებაში, შემოვიდნენ აზოტის ქარხანაში და გაირკვეს როგორ იხარჯება ქარხანაში თანხები. გვინდა, ეს ყველაფერი იყოს გამჭვირვალე და ვიცოდეთ იმ ხალხმა, ვინც ამ პროდუქტს ვაწარმოებთ და რომელიც პროდუქტიც სახელმწიფოს დიდ შემოსავალს აძლევს“, - განაცხადა აქციის ერთ-ერთმა მონაწილემ.

გასულ დღეებში: „რუსთავის აზოტის“ ერთ-ერთი დასაქმებული, რომელიც თითქმის ერთი კვირაა ხელფასის გაზრდის მოთხოვნით, კომპანიასთან საპროტესტო აქციების მონაწილეა, აცხადებს, რომ პროტესტი მოთხოვნების დაკმაყოფილებამდე გაგრძელდება. როგორც ბაჩანა კაპანაძემ BM.GE-ის განუცხადა, კომპანიის 1 000-მდე დასაქმებულის ძირითადი მოთხოვნა ხელფასის 300 ლარით გაზრდაა.


#ახალიამბები #BusinessMediaGeorgia