„თეგეტა მოტორსმა“ Mobil-თან პარტნიორობით უზბეკეთში პირველი სერვისცენტრი გახსნა. საავტომობილო ინდუსტრიის ერთ-ერთი წამყვანი ბრენდი ახლა უკვე ტაშკენტის მოსახლეობას მოემსახურება. „თეგეტა მოტორსი“ ამერიკულ ბრენდს უზბეკეთში ექსკლუზიურად წარმოადგენს. ახალი საავტომობილო ცენტრის საინვესტიციო მოცულობა 500 000 ამერიკული დოლარია. „თეგეტა მოტორსის“ ახალი ფილიალი, რომელიც მსუბუქი ავტომობილებისა და მინი-სატვირთოების მფლობელებს მოემსახურება, ტაშკენტის ცენტრალურ ნაწილშია განთავსებული. მომხმარებელი ფილიალში სწრაფ სერვისებს მიიღებს. როგორც კომპანიაში აღნიშნავენ, „თეგეტა მოტორსის“ მაღალკვალიფიციური და გამოცდილი მექანიკოსებით დაკომპლექტებულ სერვისცენტრში უზბეკეთის დედაქალაქის მცხოვრებლები ზეთის, საბურავების, ხუნდების, აკუმულატორებისა და გაგრილების სითხეების შეცვლას შეძლებენ.


#ახალიამბები #BusinessMediaGeorgia