უსაფრთხოა თუ არა საქართველოს ბაზარზე განთავსებული რძის პროდუქტები - ეს საკითხი მიმდინარე კვირაში კიდევ ერთხელ გახდა აქტუალური. კვირის დასაწყისში „რადიო თავისუფლების“ მიერ გამოქვეყნებული საგამოძიებო სტატიით გაირკვა, რომ რძის მწარმოებელი კომპანია „ყვარლის ბაგა“, რომელსაც ათასობით ძროხა ჰყავს, გასულ პერიოდში საქონლის გამოსაკვებად ქათმის ნაკელს იყენებდა. „ყვარლის ბაგის“ რძეს კი კომპანიები „სანტე“, „სოფლის ნობათი“, „აგროჰაბი“ და „ყვარლის ბაგის“ შვილობილი „რძის ლაბორატორია“ ყიდულობდნენ. თავის მხრივ კი ყვარლის ბაგას და „ჩირინას“, „ბიუ-ბიუს“ შორის სასამართლო დავა მიმდინარეობდა. რძის მწარმოებელი კომპანია ჩირინას 2018-19 წლებში 200-მდე ძროხის დახოცვაში ადანაშაულებდა და ამტკიცებდა, რომ ნაყიდ ნაკელში ანტიბიოტიკი აღმოჩნდა. თავის მხრივ, კომპანია "ჩირინა" "ყვარლის ბაგასთან" არსებული სამართლებრივი დავის შესახებ განცხადება გაავრცელა, სადაც ნათქვამია, რომ "ბიუ ბიუს" პროდუქციას ანტიბიოტიკებზე პერიოდულად სურსათის ეროვნული სააგენტო ამოწმებს და პროდუქტი სრულიად სუფთაა. ამ მოვლენების გასაჯაროებიდან რამდენიმე დღეში, გუშინ, სურსათის ეროვნულმა სააგენტომ ინფორმაცია გაავრცელა, რომლის თანახმადაც "სოფლის ნობათის" რძის ნიმუშებში აფლატოქსინი გამოვლინდა. კერძოდ, იმპორტირებული რძის ხუთ ნიმუშში, რომლიდანაც ერთი არის ბავშვთა კვებისთვის განკუთვნილი, აფლატოქსინ M1-ის გადაჭარბებული ოდენობა დაფიქსირდა. გუშინ გვიან ღამით სოფლის ნობათის მიერ გავრცელებულ განცხადებაში ნათქვამი იყო, რომ რძის აღნიშნული პარტიის გაყიდვიდან ამოღებაზე მუშაობა დაწყებულია.

სტუმარი: კახა კონიაშვილი - რძის მწარმოებელთა გაერთიანების თავმჯდომარე;


#ახალიამბები #BusinessMediaGeorgia