საპენსიო სააგენტომ 2024 წლის დეკემბრის საინვესტიციო პორტფელის ანგარიში გამოაქვეყნა, რომლის მიხედვითაც სისტემის მონაწილეთა რაოდენობაა - 1 403 358, ხოლო ფონდის მთლიანი ზომა 6 მლრდ ლარს გადააჭარბა. შესაბამისად, საპენსიო სისტემის თითოეული მონაწილის მიერ დაზოგილი თანხის მოცულობა საშუალოდ 4 320 ლარია.

აღსანიშნავია, რომ 2024 წლის 31 დეკემბრის მდგომარეობით, მოსახლეობის საპენსიო დანაზოგების თითქმის 99% ანუ 5.9 მილიარდი ლარი დაბალრისკიან საინვესტიციო პორტფელში იყო განთავსებული.

უფრო კონკრეტულად, მოქალაქეთა საპენსიო დანაზოგები საინვესტიციო პროტფელების მიხედვით, შემდეგნაირად ნაწილდება:
კონსერვატიულ ანუ ნაკლებრისკიან საინვესტიციო პორტფელში - 1 393 500 მონაწილეა, ფონდის ზომა - 5 მლრდ 997 მლნ ლარი, დანაზოგი ერთ პირზე კი საშუალოდ 4 303 ლარია;

დაბალანსებულ ანუ საშუალორისკიან საინვესტიციო პორტფელში ირიცხება - 4 714 მონაწილე, ჯამური თანხით 33 100 000 ლარი, დანაზოგი ერთ პირზე საშუალოდ 7 021 ლარი;

და დინამიკურ ანუ მაღალრისკიან საინვესტიციო პორტფელში სულ 5 144 მოქალაქეა 33 მლნ 500 000 ლარით, დანაზოგი ერთ პირზე კი შეადგენს 6 512 ლარს.

სააგენტოს მიერ გამოქვეყნებული 2024 წლის დეკემბრის მიმოხილვის მიხედვით, საპენსიო სქემაში გაწევრიანებულ მონაწილეთა რაოდენობა მილიონ 582 ათასი ადამიანი იყო, საიდანაც 15 458-მა პირმა დაგროვებითი პენსიით ისარგებლა, მათზე პენსიის სახით კი 61.1 მლნ ლარი გაიცა.

"აღსანიშნავია, რომ 2024 წლის დეკემბრის მდგომარეობით აკუმულირებული ამონაგებით როგორც ნომინალურ, ისე რეალურ რიცხვებში დინამიკური პორტფელი ლიდერობს. 2023 წლის 6 აგვისტოდან 2024 წლის 31 დეკემბრის ჩათვლით პერიოდში დინამიკური პორტფელის რეალურმა ამონაგებმა 15.3% შეადგინა, იმავე პერიოდში დაბალანსებული და კონსერვატიული პორტფელების რეალური ამონაგები შესაბამისად 14.3% და 12.8% იყო. აღნიშნულ პორტფელებს შორის მთავარი სხვაობა პორტფელებში გლობალური აქციების პროპორციაა. ნოემბრის ბოლოს მდგომარეობით, დინამიკურ პორტფელში აქციების წილი 50.8%, დაბალანსებულში 29.9%, ხოლო კონსერვატიულში 16.2% იყო,“- ნათქვამია საპენსიო სააგენტოს ინფორმაციაში.


#ახალიამბები #BusinessMediaGeorgia