პანდემიის პერიოდში, განსაკუთრებით 2020 წელს, როგორც მსოფლიოში, ასევე საქართველოში, ეკოტურიზმი ერთ-ერთი ყველაზე მოთხოვნადი მიმართულება გახდა და ის ტურიზმის ყველაზე მზარდ სეგმენტად გადაიქცა. ბუნებრივი რესურსების მდგრადი გამოყენება და ეკოსისტემის შენარჩუნება მნიშვნელოვანია როგორც მიმდინარე, ასევე მომა­ვალი თაობების მოთხოვნების დასაკმაყოფილებლად. ამისათვის აუცილებელია ბუნებასთან ურთიერთობის კულტურის ამაღლება და ბუნებრივ გარემოში ქცევის ეთიკური ნორმების გამომუშავება. დღესდღეობით საქართველოში ეკოლოგიური ტურიზმი წინ მიი­წევს, მაგრამ ჯერ კიდევ ბევრია გასაკეთებელი. ჯერ კიდევ ბევრი არასწორი სტერეოტიპია მის ირგვლივ დამკვიდრებული და ზოგადად ტერმინიც ხშირად არასწორად გვესმის. ამიტომ საქართველოს ეკონომიკისა და მდგრადი განვითარების მინისტრმა, ნათია თურნავამ და საქართველოს გარემოს დაცვისა და სოფლის მეურნეობის მინისტრმა, ლევან დავითაშვილმა ეკოტურიზმის სტრატეგიას მოაწერეს ხელი, რომლის მიზანი ქვეყნის მასშტაბით კონკურენტუნარიანი ეკოტურისტული სერვისებისა და პროდუქტების შექმნა, დივერსიფიცირება, ხარისხის გაუმჯობესება და განვითარება სახელდება. სტრატეგიის მიხედვით 2030 წლისათვის საქართველო კავკასიის რეგიონში წამყვანი ეკოტურისტული ქვეყანა უნდა გახდეს, რომელიც მდიდარი ცოცხალი კულტურისა და ბუნების, აგრეთვე მაღალი ხარისხის მომსახურების გათვალისწინებით ოთხივე სეზონის ეკოტურისტულ შეთავაზებებს უზრუნველყოფს. ვნახოთ რა გამოგვივა, თუმცა მანამდე მოგიყვებით, რას გულისხმობს აღნიშნული სტრატეგია და რა სარგებელს მოუტანს ქვეყანას?

#ახალიამბები #BusinessMediaGeorgia