2017 წლის მდგომარეობით, ქვეყანაში ხელფასების სტატისტიკა საქსტატმა გამოაქვეყნა. ეროვნული ბანკის ახალი რეგულაციებით, რასაც ბიემჯი მთელი კვირის მანძილზე უთმობდა დროს ყველა გადაცემის ეთერში, სულ უფრო მეტი წონა ექნება იმ შემოსავლებს, რომელთა დადასტურებაც შესაძლებელია. ამასთან, მომხმარებლისთვის კონკრეტულად განისაზღვრება, თუ რამდენის გადადების უფლება ექნება სესხის დასაფარავად.
რა ირკვევა საქსტატზე დაყრდნობით ძალიან მოკლედ? ხელფასები მზარდია ყველა სექტორში და პრაქტიკულად ყველა ეკონომიკური საქმიანობის მიმართულებით. მაგრამ - ეშმაკი დეტალებშია. მაგალითად, მიუხედავად იმისა, რომ ჩვენს ქვეყანაში 2017 წელს ყოველთვიური საშუალო ნომინალური ხელფასი 6.3 პროცენტით გაიზარდა, ის 1000 ლარსაც ვერ აღწევს. ამ ზრდის მთავარი მამოძრავებელი არასახელმწიფო სექტორია. ბიზნესსექტორში ყველაზე მაღალანაზღაურებადია სამეცნიერო და ტექნიკური საქმიანობები და მშენებლობა. წლიურ ჭრილში ეს საქმიანობები 11%-ზე მეტით არის გაზრდილი, ოღონდ, აქაც, გრაფიკაზე ნათლად ხედავთ, რომ საშუალო ნომინალური ხელფასი ვერცერთ შემთხვევაში ვერ აღწევს თუნდაც 2 ათას ლარს. აქვე ვთქვათ, რომ არასამეწარმეო და საფინანსო სფეროში დაქირავებით დასაქმებულთა საშუალო ხელფასი ერთი წლის მანძილზე მხოლოდ 2 პროცენტით არის გაზრდილი.

სტუმარი: ზვიად ხორგუაშვილი - ეკონომისტი