გლობალური ბიზნესისა და ინვესტირების ფორუმს უკვე მეორე წელია საქმიან ქალთა გაერთიანება ატარებს. მისი პარტნიორი ამ საქმეში საქართველოსა და აზია-აფრიკის სავაჭრო-სამრეწველო პალატაა. ფორუმის მთავარი მიზანია საქართველოს პოტენციალის და საინვესტიციო შესაძლებლობების წარდგენა, საქმიანი ადამიანების წრის გაფართოება, საერთაშორისო კონტაქტების დამყარება და გამოცდილების გაზიარება.

ფორუმს 12-ზე მეტი სპიკერი ჰყავდა. შარშანდელთან შედარებით დელეგატების რაოდენობაც გაზრდილია და თუ გასულ წელს საქმიან ქალთა გაერთიანება 200 დელეგატს მასპინძლობდა 17 ქვეყნიდან, წელს, ორგანიზატორთა მონაცემებით, დელეგატების რაოდენობამ 300-ს გადააჭარბა. სპიკერების მოხსენებების გარდა, გაიმართა B2B შეხვედრებიც, რომლებიც ხვალაც გრძელდება.