#დეკრიმინალიზაცია
ორგანიზაცია „გირჩის“ წარმომადგენელმა ზურაბ ჯაფარიძემ განაცხადა, რომ ნარკოტიკების ლეგალიზაცია საშიში არაა. „ლეგალიზაციის არ უნდა გვეშინოდეს. რაღაც კონკრეტული ნივთიერების ბაზარზე რეგულირებულ დაშვებაზე უნდა იყოს აქცენტი გაკეთებული. დაწესდეს ასაკობრივი ზღვარი, დავადოთ აქციზი, რომლის ფასის გამოც ხელმისაწვდომობა არ იქნება“, - აღნიშნა ზურაბ ჯაფარიძემ გადაცემა „არჩევანში“. საუბრისას მან ხაზი გაუსვა ადამიანის ფუნდამენტურ უფლებებსაც. „ადამიანის ფუნდამენტური უფლებაა, რომ სხეული ადამიანის საკუთებაა. ჩვენი ლოზუნგია, რომ ადამიანს შეუძლია, საკუთარ სხეულს ის უქნას, რაც უნდა. ეს მიდგომა არასწორია, რომ ადამიანები არიან სულელები, აქეთ კი გრძნეული ქურუმები არიან შეკრებილები, რომლებმაც იციან, როგორ მოუარონ, რა დაუშალონ ან რისი უფლება მისცენ. არ ვაღიარებ საზოგადოების არცერთი ნაწილის აზრს, რომ მან განმისაზღვროს, ჩემს სხეულს რა ვუქნა“, - თქვა ზურაბ ჯაფარიძემ. ამასთან, მან თქვა, რომ ახალი წლისთვის დაანონსებული აქცია არის კანონდარღვევა, მაგრამ საზოგადოების წინაშე მდგარ მძიმე პრობლემასთან დასაპირისპირებლად სხვა გზა არ დარჩათ. „ვიცი ზუსტად, რომ ვარღვევთ კანონს და მემუქრება 8-12-წლიანი ციხე, მაგრამ ფეხებზე მკიდია, სხვა გზა აღარ გვაქვს“, - განაცხადა ზურაბ ჯაფარიძემ.