თბილისში მულტიფუნქციური კომპლექსის, Downtown Tbilisi-ის და მისი პირველი შენობის - Trump Tower-ის ოფიციალური პრეზენტაცია გაიმართა, რომელსაც მთავრობისა და ადგილობრივი ბიზნესსექტორის წარმომადგენლებთან ერთად, ამერიკიდან ჩამოსული The Trump Organization-ის აღმასრულებელი ვიცე-პრეზიდენტები ესწრებოდნენ. პროექტის ჯამური საინვესტიციო ღირებულება 2 მილიარდ დოლარს შეადგენს. გეგმის მიხედვით, კომპლექსი სულ ექვსი დამოუკიდებელი შენობისგან შედგება, სადაც საცხოვრებელი, ბიზნეს, სავაჭრო და საზოგადოებრივი სივრცეები გაერთიანდება. დეველოპერების განცხადებით, საერთაშორისო ბრენდის შემოსვლა ქვეყნის ეკონომიკაზე პირდაპირ აისახება და ბაზარზე ახალ აუდიტორიას გააჩენს. ინვესტორების მოსაზრებით, მასშტაბური მშენებლობის ახლავე დაწყება ბოლო პერიოდში დაფიქსირებულმა მაკროეკონომიკურმა მაჩვენებლებმა განაპირობა. პროექტის პარტნიორების განმარტებით, გასულ 5 წელში არსებულმა 9%-იანმა ეკონომიკურმა ზრდამ და უძრავი ქონების სექტორის 10-15%-იანმა გაფართოებამ გადაწყვეტილების დაჩქარება გამოიწვია. შედეგად, ინვესტიციის განხორციელება დაგეგმილზე 5-10 წლით ადრე იწყება.მულტიფუნქციური პროექტი The Trump Organization-თან პარტნიორობით ხორციელდება. მთავარი დეველოპერები კომპანიები - არქი და ინვია არიან, თანადეველოპერის პოზიციას კი The Sapir Organization-ი იკავებს.როგორც კომპანია არქის დამფუძნებელმა, ილია წულაიამ აღნიშნა, პროექტის მიმართ ინტერესი უკვე ფიქსირდება და უშუალოდ Trump Tower Tbilisi-ში უძრავი ქონება 7-მა ქართველმა მყიდველმა უკვე შეიძინა.


#ახალიამბები #BusinessMediaGeorgia