"ამბასადორი აილენდ ბათუმმა“ კერძო ავიაციის 50 პილოტს უმასპინძლა, რომლებიც კაჭრეთში, „ამბასადორის საავიაციო სოფლის“ ოფიციალური გახსნის ღონისძიებაში მონაწილეობისთვის აშშ-დან და ევროპის სხვადასხვა ქალაქებიდან ჩამოვიდნენ. პილოტები ესტუმრნენ ამბასადორის კუნძულს და ადგილზე გაეცნენ პროექტის მასშტაბს, უკვე განხორციელებულ სამუშაოებს, მიმდინარე სამშენებლო პროგრესს, განვითარების ხედვასა და სამომავლო გეგმებს. განსაკუთრებული ყურადღება დაეთმო პროექტში გათვალისწინებულ საავიაციო ინფრასტრუქტურას, მათ შორის ასაფრენ-დასაფრენ ზოლს, რომლის განვითარებაც მომავალში კუნძულზე კერძო ავიაციის ფრენების მიღების შესაძლებლობას შექმნის. პროექტის განვითარების ერთ-ერთი მნიშვნელოვანი მიმართულებაა საჰაერო კავშირების გაძლიერება - როგორც საქართველოს სხვადასხვა რეგიონსა და ადგილობრივ კურორტებს შორის, ისე საერთაშორისო მიმართულებებთან.

პილოტებს კუნძულზე „ამბასადორი ჯგუფის“ დამფუძნებელი თორნიკე ქებურია მიესალმა, რომელმაც კუნძულზე საჰაერო ხომალდით დაშვებაც განახორციელა.

ბათუმში ვიზიტის შემდეგ ექსპედიციის მონაწილეები კახეთში გაემგზავრნენ, სადაც Ambassadori Aviation Village-ის ოფიციალური გახსნა ხვალ გაიმართება. ახალი საავიაციო ინფრასტრუქტურის განვითარება და ექსპედიციის ორგანიზება ხელს შეუწყობს საქართველოში კერძო ავიაციისა და საავიაციო ტურიზმის განვითარებას და ქვეყნის საერთაშორისო ზოგადი ავიაციის რუკაზე პოზიციონირებას.

ვიდრე ეს პრეზენტაცია შედგება, ავიაციის სააგენტომ გაავრცელა ინფორმაცია, რომლის მიხედვითაც კაჭრეთის საფრენმა მოედანმა სამოქალაქო ავიაციის სააგენტოს რეგისტრაცია გაიარა. რეგისტრაციის პროცესი ორი თვის განმავლობაში მიმდინარეობდა და მოიცავდა როგორც შესაბამისი დოკუმენტაციის შესწავლას, ისე არსებული ინფრასტრუქტურის ინსპექტირებას. შპს „ამბასადორის საავიაციო სოფლის“ საკუთრებაში არსებული საფრენი მოედანი სასტუმრო-კომპლექს „ამბასადორი კაჭრეთის“ მიმდებარედ მდებარეობს და წარმოადგენს 1A კოდის აეროდრომის სტანდარტებით მოწყობილ ასფალტის საფარიან ასაფრენ-დასაფრენ ზოლს პარალელური სამიმოსვლო ბილიკით.


#ახალიამბები #BusinessMediaGeorgia