1 სექტემბრიდან, 60 წელს ზემოთ პირებისთვის საბარათე ოპერაციებზე მოთხოვნები გამკაცრდება - ამის შესახებ ინფორმაციას საქართველოს ეროვნული ბანკი ავრცელებს. მათი განმარტებით, ცვლილება შედის მომხმარებლის ძლიერი ავთენტიფიკაციისა და ფინანსური ორგანიზაციების მიერ მომსახურების გაწევისას მომხმარებელთა უფლებების დაცვის წესში, რაც ხელს შეუწყობს მოწყვლადი სეგმენტის - 60 წელს გადაცილებული მომხმარებლის დაცვას თაღლითური სქემებისგან. ცვლილებების მიხედვით, ბანკები დროებით შეაჩერებენ იმ საბანკო გადარიცხვებს, რომელიც შეეხება სავარაუდო მაღალი რისკის ოპერაციებს. ასეთად კი სები განიხილავს 500 ლარზე მეტი თანხის გაცემას ონლაინ სავაჭრო პლატფორმებზე, სათამაშო ბიზნესში, საინვესტიციო მიზნით და ვირტუალურ აქტივებთან. რისკიანი ოპერაციის დაფიქსირების შემთხვევაში, საგადახდო მომსახურების პროვაიდერი ვალდებული იქნება დაუკავშირდეს მომხმარებელს, მოახდინოს მისი ინფორმირება მომხმარებლის მიერ ინფორმაციის უკეთ გაანალიზების ხელშეწყობის მიზნით, რითაც შემცირებული იქნება თაღლითების მანიპულაციის ქვეშ მომხმარებლის მიერ ოპერაციების განხორციელების რისკი. ამასთან, აღსანიშნავია, რომ მომხმარებელს მის მიერ რისკიანი ან/და საეჭვო ტრანზაქციის ინიციირების შემდეგ 48 საათი ექნება იმისთვის, რომ მომხმარებელმა მიიღოს საბოლოო გადაწყვეტილება ტრანზაქციის განხორციელების შესახებ და აღნიშნული დაუდასტუროს მომსახურების პროვაიდერს. აღსანიშნავია, რომ პირველ ეტაპზე სებ-ის მიერ შემუშავებული ახალი წესი მხოლოდ საბარათე ოპერაციებზე გავრცელდება.

სტუმარი: გიორგი კეპულაძე - "საზოგადოება და ბანკები", გამგეობის თავმჯდომარე

#ახალიამბები #BusinessMediaGeorgia