4 თებერვალს ქუთაისში, ქართველი საზოგადო მოღვაწის და პუბლიცისტის, დიმიტრი ყიფიანის ოჯახში, პირველ ქართველ მეცნიერ ქალად აღიარებული, იგივე ვარა ყიფიანი დაიბადა.

ბრიუსელის უნივერსიტეტში მოღვაწე პირველი ქართველი ფსიქო-ფიზიოლოგი ქალიც გახლდათ ბარბარე ყიფიანი, რომლის ნაშრომებმა ბავშთა ფიზიოლოგიისა და პათოლოგიის საკითხებზე საერთაშორისო აღიარება და ოქროს მედლის პრემიერ მოიპოვა.მისი საინტერესო კვლევების შესახებ იწერებოდა ევროპის პრესაში, მისი ნაშრომები იბეჭდებოდა სხვადასხვა ენაზე. ბარბარე ყიფიანი, როგორც მეცნიერი ფიზიოლოგი, დაჯილდოებულია სხვადასხვა ქვეყნის სიგელებით, ვერცხლისა და ოქროს მედლებით. ის ასევე ეწეოდა აკადემიურ საქმიანობას, კითხულობდა ლექციებს ბრიუსელის, ლიეჟის, პარიზისა და ჟენევის უნივერსიტეტებში.

1910 წელს ბარბარე ყიფიანის თაოსნობით ბრიუსელის საერთაშორისო მუზეუმში დაარსდა მსოფლიო ხალხთა ისტორიისა და ეთნოგრაფიის ქართული სექცია, რასაც დიდი მნიშვნელობა ჰქონდა საზღვარგარეთ ქართული სულიერებისა და კულტურის პოპულარიზაციისთვის.1940 წელს, საბჭოთა მმართველობისგან ემიგრაციის პირობებში, მეორე მსოფლიო ომის დროს, როგორც სალომე დადიანისა და მიურატების ქონების მეურვემ, მიუნხენიდან გამოიძახა ქართველოლოგი, ქართული დამწერლობისა და კულტურის მკვლევარი მიხეილ თარხნიშვილი და შესთავაზა, ნაანდერძევი სახსრებით, ფულითა და ნივთებით, დაეარსებინა რომის კათოლიკური მონასტერი ქართული კულტურის ძეგლების შესანარჩუნებლად. მიხეილ თარხნიშვილს მიუღია ეს წინადადება, შეუძენია სამონასტრო შენობა და ბარბარე ყიფიანისაგან მიღებული ნივთები და დოკუმენტები იქ დაუბინავებია. ამავე მონასტერში გადმოუტანია კონსტანტინოპოლის ქართული კათოლიკური მონასტრიდან წამოღებული უნიკალური მასალები, ჩამოუყალიბებია ქართული არქივი, ქართული კათოლიკური სასულიერო სემინარია და თვითონ დამდგარა რექტორად. სწორედ მისი დამსახურებაა, რომ ბევრმა ქართველმა ახალგაზრდამ უმაღლესი განათლება ევროპის უნივერსიტეტებში მიიღო. ის 1965 წელს გარდაიცვალა, დაკრძალულია ქალაქ ბრიუსელში.

#ახალიამბები #BusinessMediaGeorgia