#ახალიამბები
გიორგი კოხრეიძე და თამილა დოლიძე - აჭარის უმაღლესმა საბჭომ პლენარულ სხდომაზე, საზოგადოებრივი მაუწყებლის სამეურვეო საბჭოს წევრობის ორი კანდიდატი შეარჩია. რეგიონის წარმომადგენლობით ორგანოს ამისთვის შემადგენლობის ერთი მესამედის ხმა სჭირდებოდა. პროცესი ოპოზიციის კრიტიკის საგანი გახდა. „ერთიანი ნაციონალური მოძრაობის“ წევრების განცხადებით, დღეს კენჭი ეყარა იმას, რომ საზოგადოებრივი მაუწყებელი გახდეს ხელისუფლების პროპაგანდას დაქვემდებარებული. გია აბულაძემ, ლევან ანთაძემ და ელგუჯა ბაგრატიონმა დეპუტატებს მოუწოდეს, არ მიიღონ მონაწილეობა მმართველი გუნდის მიერ დადგმულ სამარცხვინო სპეკტაკლში, რომელიც საზმაუს განადგურებასა და მედიის დასუსტებას ემსახურება. ოპოზიციამ პროტესტის ნიშნად სხდომათა დარბაზი დატოვა, თუმცა მმართველმა გუნდმა სამეურვეო საბჭოს წევრობის ორი კანდიდატი მაინც აირჩია. პროცედურულად, შერჩეული კანდიდატები პარლამენტს დასამტკიცებლად წარედგინება. ცნობისთვის, გიორგი კოხრეიძის სახელს არაერთი უკანონო გადაწყვეტილება და მაუწყებლის პრიორიტეტების შეუსრულებლობა უკავშირდება.