#ახალიამბები
ბათუმის შოთა რუსთაველის სახელმწიფო უნივერსიტეტის პროფესიული პროგრამების მართვისა და უწყვეტი განათლების ცენტრის ბაზაზე აგრარული ექსტენციის ცენტრი გაიხსნა. ცერემონიას აშშ-ის ელჩი კელი დეგნანი, აჭარის სოფლის მეურნეობის მინისტრი ზაზა შავაძე და განათლების, კულტურისა და სპორტის მინისტრი მაია ხაჯიშვილი ესწრებოდნენ. ცენტრის დაარსების მიზანი, სოფლის მეურნეობის დარგების მხარდაჭერაა. იგი განახორციელებს ფორმალურ და არაფორმალურ საგანმანათლებლო პროგრამებს, სასკოლო და სტუდენტურ აქტივობებს, პრაქტიკოს ექსტენციონისტებთან ერთობლივ ინიციატივებს და სამეცნიერო პროექტებს. ,,აგრო-კლინიკის“ საქმიანობაში ჩართული იქნება აგრარული მიმართულების აკადემიური პერსონალი, რომლებიც ამერიკელმა ექსპერტებმა გადაამზადეს. სტუდენტები გაეცნობიან თანამედროვე ტექნოლოგიებით საველე პირობებში მუშაობის ტექნიკას, დარგში მიმდინარე მიღწევებსა და სადემონსტრაციო ნაკვეთების მოწყობას.