#ახალიამბები

სამომხმარებლო სესხებზე ვადა 4-დან 3 წლამდე შემცირდა. საქართველოს ეროვნული ბანკის გადაწყვეტილებით, 15 აგვისტოდან ფიზიკური პირების დაკრედიტების პირობები იცვლება და 4-წლიანი სესხების გაცემა იკრძალება. კობა გვენეტაძის განცხადებით, 2019 წელს, მას შემდეგ, რაც ფიზიკური პირების პასუხისმგებლიანი დაკრედიტების ჩარჩო ამოქმედდა, შეჩერდა სესხების ჭარბი ზრდიდან მომდინარე ფინანსური სტაბილურობის რისკები. ასევე, ამან ხელი შეუწყო სესხების უფრო პროდუქტიულ სექტორებში გადამისამართებას. სების პრეზიდენტის თქმითვე, „მონეტარული პოლიტიკა გამკაცრებული დარჩება მანამ, სანამ ინფლაციურ მოლოდინებზე ზრდის მიმართულებით არსებული რისკები საკმარისად არ შერბილდება“. ახალი ცვლილება ერთი წლის განმავლობაში იქნება ძალაში. ერთი წლის შემდეგ კი დღევანდელი გადაწყვეტილება გადაიხედება.