#ახალიამბები
საქართველო დამოუკიდებლობის დღეს აღნიშნავს. „ევროპისკენ" - ასე ჟღერს ზეიმის წლევანდელი სლოგანი. ცერემონიაზე პირველად შესრულდება ევროკავშირის ჰიმნი, საქართველოს ეროვნულ ჰიმნს კი, პირველად ბავშვები იმღერებენ. ქართველი სამხედროების გვერდით ამერიკელი ჯარისკაცები იდგებიან. უცვლელი რჩება რეკრუტების ფიცის დადების საზეიმო ცერემონიალი. ღონისძიება 12 საათზე თბილისთან ერთად კიდევ 5 ადგილას ერთმანეთის პარალელურად დაიწყო. ზეიმის განუყოფელ ნაწილად რჩება საქართველოს თავდაცვის შეიარაღებაში არსებული მძიმე ტექნიკის გამოფენა, მოდერნიზებული ვერტმფრენების სანახაობრივი მანევრები და გალა-კონცერტი. შეგახსენებთ, 1918 წლის 26 მაისს საქართველოს ეროვნულმა საბჭომ მიიღო სახელმწიფოებრივი დამოუკიდებლობის აქტი და ჩამოაყალიბა დამოუკიდებელი საქართველოს მთავრობა. სახელმწიფოს პოლიტიკური მმართველობის ფორმად აღიარეს დემოკრატიული რესპუბლიკა; შეიქმნა ევროპული ტიპის ქართული სახელმწიფოებრიობა, დემოკრატიული სისტემა.