ეს ჰაიდარ აბაშიძის ქუჩაა, 110 ნომერი. ამ სახლის ხილვისას, დახრილობის გამო, ბევრ თქვენგანს ალბათ პიზას კოშკი გაახსენდა. არადა ავარიული საცხოვრებელი ბათუმში, ე.წ ჭაობის დასახლებაში მდებარეობს. დიასახლისი გვიყვება, რომ ბოლო 10 წელია, შენობა ნგრევის პროცესშია.
სიტუაცია კიდევ უფრო მძიმდება სახლთან მიახლოებისას. ეზოში შესულებს ეს რეალობა გვხვდება.
შენობას სიმაღლე, როგორც ოჯახის წევრი ყვება, ყოველწლიურად აკლდება. ნაირა გოგიტიძის თქმით, რამდენიმე წლის წინ, პირველ სართულზე, ცხოვრობდნენ კიდეც, თუმცა დროთა განმავლობაში, სახლი იმდენად დადაბლდა, რომ დღეს ეს შეუძლებელია. კიდევ უფრო მძიმე მდგომარეობაა მეორე სართულზე. კედლები დაბზარულია, იატაკი დახრილი. სახლს საყრდენი ნებისნიერ დროს შეიძლება გამოეცალოს.
ასეთი სურათია იქ, სადაც ნაირას, მეუღლესთან და შვილთან ერთად სძინავს. თუმცა, უკეთესი მდგომარეობა არც სახლის სხვა ნაწილებშია. საფრთხის შემცველ გარემოში მცხოვრებლებს ალტერნატივა არ აქვთ. ფინანსური სიდუხჭირის გამო, გამოსავალს ვერ პოულობენ.
უამინდობისას ავარიულ სახლში უარესი მდგომარეობა იქმნება, საცხოვრებელში წყალი ჩადის. ადგილობრივ ხელისუფლებას ბევრჯერ მიმართეს, თუმცა, უშედეგოდ. მიუხედავად იმისა, რომ გეოლოგის დასკვნის მიხედვით აქ ყოფნა საფრთხის შემცველია, თვითმმართველობას უკიდურესად გაჭირვებული ოჯახი არ ახსოვს.
გაეწევა თუ არა რაიმე სახის დახმარება ჰაიდარ აბაშიძის 110 ნომერში მცხოვრებლებს? კითხვით ბათუმის მერიას მივმართეთ. საქალაქო ინფრასტრუქტურისა და კეთილმოწყობის სამმართველოში სატელევიზიო კომენტარი არ გააკეთეს. შესაბამისად, ვერ გავიგეთ, როდემდე მოუწევთ ადამიანებს პიზას კოშკის მსგავს, ავარიულ სახლში ცხოვრება