საქართველოს დაცული ტერიტორიების სააგენტო ახალ, უნიკალურ კადრებს ავრცელებს. მოკლე ვიდეორგოლში ჩანს ევროპული შველი, რომელიც ლაგოდეხის დაცულ ტერიტორიაზე ბინადრობს.

„ეს სახეობა ეგუება მრავალფეროვან საარსებო გარემოს, თუმცა უპირატესობას ანიჭებს ტყეებს, რომლებიც ღია ადგილებითაა გარშემორტყმული და საბალახოდ გადის. იკვებება ბალახით, კენკრით, ხეებისა და ბუჩქების ფოთლებით, ნეკერითა და სხვა“, – აცხადებენ საქართველოს დაცული ტერიტორიების სააგენტოში.

ბიომრავალფეროვნების კუთხით ლაგოდეხის დაცული ტერიტორიები ერთ-ერთი ყველაზე მნიშვნელოვანი ადგილია საქართველოსა და მთელ კავკასიის რეგიონში.

ბუნების დაცვის მსოფლიო ფონდის მიერ (WWF) იდენტიფიცირებულია, როგორც –

ერთ-ერთი განსაკუთრებული მნიშვნელობის გლობალური ეკო-რეგიონი (კავკასიური შერეული ტყეების ეკო-რეგიონი);
ძირითადი ორნიტოლოგიური ტერიტორია (Important Bird Area (GE024);
საერთაშორისო კონსერვაციის (Conservation International) – ბიომრავალფეროვნების ცხელი წერტილი.
ლაგოდეხის დაცული ტერიტორიები ასევე აღიარებულია, როგორც „ზურმუხტის ქსელის“ პოტენციური კანდიდატი და საქართველოსა და ევროკავშირს შორის ასოცირების შეთანხმების ფარგლებში – კვალიფიცირდება Natura 2000-ისთვის.