ნატო-საქართველოს არსებითი პაკეტის (SNGP) ნატო-საქართველოს წვრთნებისა და შეფასების ერთობლივი ცენტრის (JTEC) უცხოელი მრჩევლები გენერალ კვინიტაძის სახელობის მედლებით დაჯილდოვდნენ
საქართველოს შეიარაღებული ძალების გენერალური შტაბის უფროსის პირველმა მოადგილემ, პოლკოვნიკმა ნიკოლოზ ჯანჯღავამ ნატო-საქართველოს წვრთნებისა და შეფასების ერთობლივ ცენტრში მოვლენილი ესპანელი და ინგლისელი მრჩევლები დააჯილდოვა. ვიცე-პოლკოვნიკი ნორბერტო სილიო ბატურონე და კაპიტანი ტობიას ბენეტი საქართველოში ექვსი თვის განმავლობაში მუშაობდნენ.
პოლკოვნიკმა ნიკოლოზ ჯანჯღავამ უცხოელ მრჩევლებს, თავდაცვის სამინისტროში ნაყოფიერი მუშაობისთვის მადლობა გადაუხადა და გენერალ გიორგი კვინიტაძის სახელობის უწყებრივი მედლები გადასცა.
ამავე ღონისძიებაზე ნატო-საქართველოს არსებითი პაკეტის ძირითადი ჯგუფის ლიდერმა საზღვაო კაპიტანმა შტეფან ანიქოფერმა თავდაცვის სფეროს ახალი ექსპერტებიც წარადგინა - საქართველოს შეიარაღებული ძალების წარმომადგენლებს გამოცდილებას ესპანელი მაიორი რიკარდო როდრიგეს დე ლა იგლესია, ინგლისელი კაპიტანი ლორენ ბარი და შვედი მაიორი ჰენრიკ ლინდბერგი გაუზიარებენ.
გენერალურ შტაბში გამართულ შეხვედრას თავდაცვის სამინისტროს ნატო-საქართველოს არსებითი პაკეტის კოორდინაციისა და მონიტორინგის სამმართველოს წარმომადგენლები დაესწრნენ.