ტამიშის გმირების გახსენება

აფხაზეთში, დაბა ტამიშთან გამართული ბრძოლის დაწყებიდან 25 წელი გავიდა. საქართველოს შეიარაღებული ძალების გენერალური შტაბის უფროსის მოადგილემ, ბრიგადის გენერალმა შალვა ჯაბახიძემ დუშეთში, წმინდა ბარბარეს სახელობის ძმათა სასაფლაოზე ტამიშის ბრძოლაში დაღუპული ქართველი მებრძოლების ხსოვნას პატივი მიაგო. მან საქართველოს ერთიანობისთვის მებრძოლი მეომრების ღვაწლი გაიხსენა და მათი საფლავები გვირგვინით შეამკო.

ძმათა სასაფლაოზე მამა გრიგოლმა ტამიშის ბრძოლაში დაღუპული მებრძოლების სულის მოსახსენიებელი პანაშვიდიც გადაიხადა.
მოგვიანებით დუშეთის კულტურის სახლში დოკუმენტური ფილმის ჩვენება გაიმართა, რომელიც აფხაზეთის ომში გმირულად დაღუპული მებრძოლების ხსოვნას მიეძღვნა. ფილმის ჩვენებას ბრიგადის გენერალი შალვა ჯაბახიძე, გენერალური შტაბის წარმომადგენლები, მეომრების ოჯახის წევრები და დუშეთის რაიონის გამგეობის წარმომადგენლები დაესწრნენ.

1993 წლის, 2 ივლისს, 05:00 საათზე, დაბა ტამიშთან აფხაზურმა მხარემ რუსეთის სამხედრო ხომალდით საზღვაო დესანტი გადმოსხა. დესანტი 600 კაცისგან შედგებოდა. გამთენიისას პირველი დარტყმა ტამიშში, ლაბრასა და ზემო კინთხში განლაგებულმა ქართულმა ქვედანაყოფებმა მიიღეს. მნიშვნელოვანი დანაკარგი განიცადა „დუშეთის“, „შავნაბადასა“ და „ავაზას“ ბატალიონებმა. ქართულმა მხარემ რამდენიმედღიანი ბრძოლის შედეგად 300-მდე მებრძოლი დაკარგა. დიდი დანაკარგის მიუხედავად, ქართველმა ჯარისკაცებმა დესანტის მოგერიება და პოზიციების შენარჩუნება შეძლეს.