„ნატო-საქართველოს არსებითი პაკეტი 2018 კონფერენცია“ (SNGP) ოფიციალურად დასრულდა. სამ დღიანი კონფერენცია საქართველოს თავდაცვის მინისტრის პირველმა მოადგილემ ლელა ჩიქოვანმა დახურა.
ღონისძიების დასკვნით დღეს სინდიკატების ხელმძღვანელებმა სამუშაო პროცესი შეაფასეს და შემაჯამებელი პრეზენტაციები წარმოადგინეს. ექსპერტების განცხადებით, ნატო-საქართველო არსებითი პაკეტის ყველა ინიციატივა გეგმის მიხედვით სრულდება, თუმცა პროცესის ბოლომდე მისაყვანად სამუშაოები აქტიურად უნდა გაგრძელდეს.
„ნატო-საქართველოს არსებითი პაკეტი 2018 კონფერენცია“ მიზნად ისახავდა იმის დემონსტრირებას, თუ როგორ შეუძლია SNGP-ის სტრუქტურას, ორგანიზაციასა და განხორციელების მექანიზმებს გახდეს განმეორებითი მოდელი ნატო-ს სხვა „თავდაცვისა და უსაფრთხოების აღმშენებლობის“ (DCB) ინიციატივებში. სასურველი შედეგის მიღწევა მოითხოვს, როგორც ჰოლისტიკურ და უწყებათაშორის მიდგომას, ასევე, ნატო-ს სტრუქტურების, მოკავშირეებისა და პარტნიორების მიერ ენერგიულ და სრულფასოვან ჩართულობას.
„ნატო-საქართველოს არსებითი პაკეტი 2018 კონფერენცია“ ჩრდილო-ატლანტიკური ალიანსის, საქართველოსა და ბულგარეთის საელჩოს მიერ ერთობლივად დაიგეგმა.