ვიდეოკონფერენცია ბერლინში გადასროლისწინა წვრთნაში მონაწილე ქვედანაყოფთან
საქართველოს შეიარაღებული ძალების გენერალური შტაბის უფროსმა გერმანიაში გადასროლისწინა წვრთნაში მონაწილე ქართველ სამხედროებს საქართველოს დამოუკიდებლობის დღე თავდაცვის სამინისტროს მართვის ცენტრიდან წინასწარ მიულოცა. ვიდეოკონფერენციის საშუალებით ჩართვისას გენერალ-მაიორმა ვლადიმერ ჩაჩიბაიამ II ქვეითი ბრიგადის ნაკრებ ასეულს, საქართველოს თავდაცვის მინისტრის ლევან იზორიას მხარდაჭერით, „მოძრავი ბიბლიოთეკის“ დაწყების შესახებ აცნობა და სამხედროებს განათლების მნიშვნელობაზე ესაუბრა.
„მოძრავი ბიბლიოთეკის“ გახსნის სურვილი გადასროლისწინა წვრთნაში მყოფმა სამხედროებმა თვითონ გამოთქვეს. წიგნები, რომელიც გერმანიაში გაიგზავნა, ქართველი სამხედროებისთვის თავდაცვის სამინისტროს გამომცემლობებმა - „ინტელექტი“ და „არტანუჯი“ აჩუქეს. დღეს, კი ვიდეოკონფერენციით ჩართვისას, საკითხავი ლიტერატურა სამხედროებს გერმანიაში საქართველოს თავდაცვის ატაშემ, პოლკოვნიკმა დავით მამულაიშვილმა უშუალოდ გადასცა.
„მოძრავი ბიბლიოთეკის“ გახსნა საქართველოს პირველი დემოკრატიული რესპუბლიკის 100 წლის საიუბილეო ღონისძიებების პრეკამპანიის ფარგლებში განხორციელდა. ბერლინთან ახლოს, კლადოვერ დამში გენერალ შტაიჰოფის ყაზარმაში სამხედროებს დამოუკიდებლობის დღე საქართველოს ელჩმა გერმანიაში ელგუჯა ხოკრიშვილმაც მიულოცა და საელჩოს ორგანიზებით, 100 წლის იუბილის აღსანიშნავად სამხედროებს ანსამბლ „ბათუმის“ კონცერტი შესთავაზა.
ქართული ქვედანაყოფი გერმანიაში გადასროლისწინა წვრთნას იანვრიდან გადის. II ქვეითი ბრიგადის ნაკრები ასეული, კაპიტან ანდრო კანკავას მეთაურობით, ავღანეთში, მაზარ-ი-შარიფში სწრაფი რეაგირების ძალების ამოცანის შესასრულებლად ემზადება, რომლის განხორციელებასაც აგვისტოდან გეგმავს.