სტაბილიზაციისა და რეკონსტრუქციის საორიენტაციო კურსი დასრულდა

თავდაცვის ინსტიტუციური აღმშენებლობის სკოლაში (DIB) სტაბილიზაციისა და რეკონსტრუქციის საორიენტაციო ხუთდღიანი კურსი დასრულდა.
სერტიფიკატების გადაცემის ცერემონიალს თავდაცვის მინისტრის პირველი მოადგილე ლელა ჩიქოვანი და იტალიის ელჩი საქართველოში ანტონიო ენრიკო ბარტოლი დაესწრნენ. მინისტრის მოადგილემ მონაწილეებს სიტყვით მიმართა, დიპლომატს თავდაცვის ინსტიტუციური აღმშენებლობის სკოლის განვითარებაში შეტანილი წვლილისა და მხარდაჭერისთვის მადლობა გადაუხადა და სერტიფიკატი გადასცა.
ტრენინგი თავდაცვის სამინისტროსა და უსაფრთხოების სექტორის სხვა წარმომადგენლებმა გაიარეს.
სწავლების მიზანს სტაბილურობისა და რეკონსტრუქციის ოპერაციებში მონაწილე მხარეებზე ზეგავლენის მქონე ფაქტორების მიმოხილვა და მრავალმხრივი თანამშრომლობისა და უწყებათაშორისო კოორდინაციის საჭიროების გაცნობიერება, პოსტკონფლიქტური სიტუაციის მრავალფეროვანი და რთული გარემოს შესახებ მსმენელების ინფორმირება წარმოადგენდა.
კურსი DIB სკოლის ორგანიზებითა და იტალიური მხარის მხარდაჭერით ჩატარდა. ნატო-საქართველოს არსებითი პაკეტის (SNGP) ფარგლებში, იტალია სკოლის პროექტის მხარდამჭერი ქვეყანაა, რაც ერთობლივი კურსების შედგენის პროცესის ხელშეწყობით გამოიხატება. სტაბილიზაციისა და რეკონსტრუქციის საორიენტაციო კურსი გასულ წელს თავდაცვის ინსტიტუციური აღმშენებლობის სკოლისა (DIB) და იტალიის არმიის პოსტკონფლიქტური ოპერაციების მართვის სასწავლო ცენტრის ერთობლივი ძალისხმევით ჩამოყალიბდა.