ნატო-საქართველოს არსებითი პაკეტის (SNGP) ძირითადი ჯგუფის ორგანიზებით დაჭრილი და დაშავებული სამხედრო მოსამსახურეების მხარდაჭერის მიზნით, საქველმოქმედო სპორტული აქცია გაიმართა.

სპორტულ შეჯიბრებაში საქართველოს ტერიტორიული მთლიანობისათვის ბრძოლებსა და საერთაშორისო სამშვიდობო მისიებში დაშავებულმა სამხედროებმა მიიღეს მონაწილეობა. მათ სპორტულ კლუბში „წრე“ სარბენ ბილიკებსა და ველოტრენაჟორებზე ირბინეს. შეჯიბრში ნატო-საქართველოს არსებითი პაკეტის ძირითადი ჯგუფის წარმომადგენლები, უცხოელი მრჩევლები და საქართველოში ნატოს სამეკავშირეო ოფისის თანამშრომლებიც მონაწილეობდნენ.
საქველმოქმედო ღონისძიების ფარგლებში შემოსული თანხები „დაჭრილ სამხედრო მოსამსახურეთა მხარდაჭერის ფონდში“ ჩაირიცხება. „დაჭრილ სამხედრო მოსამსახურეთა მხარდაჭერის ფონდი“ გასული წლის ოქტომბერში შეიქმნა და მიზნად ისახავს დაჭრილი სამხედრო მოსამსახურეებისა და მათი ოჯახის წევრების დახმარებას სხვადასხვა მიმართულებით. ფონდი აქტიურად თანამშრომლობს ამერიკულ კომპანიებთან, როგორიცაა Azalea Charity, Allied Forces Foundation.
სპორტული შეჯიბრება თავდაცვის სამინისტროს სოციალურ საკითხთა და ფსიქოლოგიური მხარდაჭერის დეპარტამენტისა და სპორტული კლუბ „წრის“ მხარდაჭერით განხორციელდა.