„წერილები ჯარისკაცებს“ ნატოს დღეების ფარგლებში


ნატოს დღეების ფარგლებში „წერილები ჯარისკაცებს“ პროექტის მორიგი ეტაპი ამჯერად გიორგი ანწუხელიძის სახელობის სერჟანტთა აკადემიაში განხორციელდა. ავღანეთიდან, „მტკიცე მხარდაჭერის“ მისიაში მონაწილე ქართველი მშვიდობისმყოფელების გამოგზავნილ საპასუხო წერილებს პატარა ადრესატები კოჯორში სამხედროებთან ერთად გაეცნენ.

თბილისის, გორის მუნიციპალიტეტისა და კახეთის რეგიონის სკოლების მოსწავლეებს სერჟანტთა აკადემიის მეთაურმა, ვიცე-პოლკოვნიკმა ზაალ ზაალიშვილმა და ნატო-საქართველოს წვრთნისა და შეფასების ცენტრის სამეთაურო-საშტაბო წვრთნების ცენტრის უფროსმა, ვიცე-პოლკოვნიკმა ბექა ამბროლაძემ იუსტიციის სამინისტროს დანაშაულის პრევენციის ცენტრის დირექტორთან თათია ხოჭოლავასთან ერთად უმასპინძლეს. ოფიცრები ბავშვებს ქართველი მშვიდობისმყოფელების მისიის შესახებ ესაუბრნენ და „ქართველები მსოფლიო მშვიდობისთვის“ ფილმიც უჩვენეს.

ბავშვებისთვის განსაკუთრებით სახალისო სამხედროებთან ერთად „ჯარისკაცის ულუფის“ დაგემოვნება, სახის შენიღბვა და მხიარული ესტაფეტა იყო. ფინიშზე მოსულებმა კი, თავდაცვის სამინისტროდან საჩუქრებიც მიიღეს.

„წერილები ჯარისკაცებს“ საქართველოს თავდაცვის, იუსტიციის და განათლებისა და მეცნიერების სამინისტროების ერთობლივი პროექტია, რომელსაც დანაშაულის პრევენციის ცენტრი სტუდენტებთან ერთად 2012 წლიდან ახორციელებს. პროექტის ფარგლებში, თბილისისა და საქართველოს რეგიონების საჯარო სკოლების მოსწავლეები წერილებს ავღანეთში მყოფ ქართველ სამხედრო მოსამსახურეებს სწერენ. საპასუხო წერილებს ბავშვებს ჯარისკაცებიც უგზავნიან. პროექტის მიზანი სამშობლოდან შორს მყოფი მებრძოლებისათვის თანადგომისა და მხარდაჭერის გამოხატვაა.