კურსების გამოშვების ცერემონია სპეციალური ოპერაციების ძალებში
საქართველოს სპეციალური ოპერაციების ძალების სამხედრო მოსამსახურეებმა აშშ-ის სპეციალური ოპერაციების ძალების მონაწილეობითა და პოლონეთის სპეციალური ოპერაციების ძალების მხარდაჭერით, სასწავლო კურსები გაიარეს. კურსების დასრულებისადმი მიძღვნილი საზეიმო ცერემონია დღეს ვაშლიჯვარში, სპეციალური ოპერაციების ძალების ბაზაზე გაიმართა.
სამხედრო მოსამსახურეებს კურსების წარმატებით დასრულება საქართველოს შეიარაღებული ძალების გენერალური შტაბის უფროსის მოადგილემ, ბრიგადის გენერალმა ზაზა ჩხაიძემ მიულოცა და წარმატებები უსურვა. სამხედრო მოსამსახურეებს სიტყვით სპეციალური ოპერაციების ძალების მეთაურმა, ვიცე-პოლკოვნიკმა თემურ ყლატეიშვილმა და აშშ-ის სპეციალური დანიშნულების ჯგუფის მეთაურმა, კაპიტანმა დანიელ მილერმა მიმართეს და სწავლების მნიშვნელობაზე ისაუბრეს. ვიცე-პოლკოვნიკმა თემურ ყლატეიშვილმა საერთაშორისო პარტნიორებს მხარდაჭერისთვის მადლობა გადაუხადა.
კურსი სახელწოდებით „გაერთიანებული კომბინირებული გაცვლითი სწავლება“ (JCET) ერთი თვის მანძილზე გრძელდებოდა და აშშ-ის სპეციალური ოპერაციების ძალების ჩართულობით განხორციელდა. პირადმა შემადგენლობამ მომზადება სხვადასხვა დისციპლინაში გაიარა და სადაზვერვო ოპერაციებში, აერომობილურ მომზადებაში, არაკონვენციური ბრძოლის დაგეგმვასა და წარმოებაში საჭირო უნარები განავითარა.
მეორე სასწავლო კურსი 2 კვირის მანძილზე მიმდინარეობდა. პოლონეთის სპეციალური ოპერაციების ძალების წარმომადგენლებმა კურსის განმავლობაში ქართველი სპეციალისტები სხვადასხვა დისციპლინაში გადაამზადეს. მონაწილეებმა დასახლებულ პუნქტში ბრძოლის, მაღალმთიან რეგიონში სროლების, სნაიპერთა მომზადების, ანტიტერორისტული ოპერაციების დაგეგმვისა და წარმოების მეთოდები დახვეწეს.
ორივე სასწავლო კურსში 52-მა სამხედრო მოსამსახურემ მიიღო მონაწილეობა.
დღესვე კურსდამთავრებულებს სერტიფიკატები, ამერიკელ და პოლონელ ინსტრუქტორებს კი მადლობის სიგელები გადაეცათ.
ღონისძიებას საქართველოს შეიარაღებული ძალების წარმომადგენლები და საქართველოში აშშ-ის თავდაცვის ატაშე, პოლკოვნიკი ჯეფრი ჰარტმანი დაესწრნენ.
საქართველოს სპეციალური ოპერაციების ძალებისა და ნატოს სპეციალური ოპერაციების სარდლობის (NSHQ) ასევე, საქართველო-პოლონეთის სპეციალური ოპერაციების ძალების ურთიერთობა 2014 წლიდან იწყება. საქართველოს სპეციალური ოპერაციების ძალები მჭიდროდ თანამშრომლობს აშშ-ის სპეციალური დანიშნულების დანაყოფებთან, რომელთა დახმარებით მრავალფეროვანი საწვრთნელი პროგრამები ხორციელდება.