ნატოს კვირეულის ფარგლებში თავდაცვის მინისტრმა სერჟანტთა აკადემიაში ლექცია წაიკითხა
-ნატოს წინაშე არსებული გამოწვევები და საქართველო - ამ სახელწოდებით ლევან იზორიამ გიორგი ანწუხელიძის სახელობის სერჟანტთა აკადემიაში ლექცია წაიკითხა. თავდაცვის მინისტრის ლექციას სერჟანტთა კორპუსის შემადგენლობა დაესწრო.
ლევან იზორიამ ყურადღება ნატოს წინაშე მდგარ გამოწვევებსა და ამ კონტექსტში საქართველოს, კონკრეტულად, თავდაცვის უწყების მოქმედებებზე გაამახვილა. მინისტრმა არსებული გამოწვევების ფონზე ორ პრიორიტეტულ საკითხზე, ეფექტიან შეკავებასა და მზადყოფნის დონის ამაღლებაზე ისაუბრა. მან სერჟანტებს ნატოს შეკავების პოლიტიკის ძირითადი მიმართულებები გააცნო და ნატოსთან თავსებადობის კუთხით, თავდაცვის სფეროში გადადგმულ ადეკვატურ ნაბიჯებზე დეტალური ინფორმაცია მიაწოდა.
საქართველოს თავდაცვის მინისტრმა ლექცია ნატოს კვირეულთან დაკავშირებით გამართული სემინარის „ჩვენი ევროპული არჩევანი: ევროპული ღირებულებები, ევროატლანტიკური ინტეგრაცია“ ფარგლებში წაიკითხა. სემინარი მინისტრმა გახსნა და მონაწილეებს წარმატებები უსურვა.
ღონისძიება თავდაცვის სამინისტროს მხარდაჭერითა და სსიპ „ნატოსა და ევროკავშირის შესახებ საინფორმაციო ცენტრის“ ორგანიზებით ტარდება. მის მიზანს ქვეყნის ევროპულ და ევროატლანტიკურ სტრუქტურებში ინტეგრაციის პროცესის შესახებ საქართველოს შეიარაღებულ ძალებში ცნობიერების ამაღლება და ინფორმირებულობა წარმოადგენს.
სემინარი „ჩვენი ევროპული არჩევანი: ევროპული ღირებულებები, ევროატლანტიკური ინტეგრაცია“ მეშვიდედ იმართება და ქვეითი ათეულის მეთაურის მომზადების კურსის, ქვეითი ოცეულის სერჟანტის მომზადების კურსისა და სერჟანტთა სამეთაურო-საშტაბო მომზადების კურსის მსმენელები ესწრებიან.
სერჟანტთა აკადემიაში საქართველოს შეიარაღებული ძალების გენერალური შტაბის უფროსი, გენერალ-მაიორი ვლადიმერ ჩაჩიბაია, მისი მოადგილეები, წვრთნებისა და სამხედრო განათლების სარდალი, პოლკოვნიკი მალხაზ მაკარაძე, შეიარაღებული ძალების მთავარი სერჟანტი, კობა ცირეკიძე და ნატოსა და ევროკავშირის შესახებ საინფორმაციო ცენტრის დირექტორი, ნინო ბოლქვაძე იმყოფებოდნენ.