სოციალურ ქსელში კემეროვოს სავაჭრო-გასართობ ცენტრში ხანძრისას დაღუპულთა ოჯახის წევრის ვიდეო ვრცელდება. იგორ ვოსტრიკოვის თქმით, ხანძრისას მისი და, ცოლი და სამი შვილი დაიღუპა - 7, 5 და 2 წლის ბავშვები. იგორის თქმით, ტყულია ინფორმაცია, რომ ხანძარს 64 ადამიანი ემსხვერპლა. მისი თქმით, ხანძარი უქმე დღეებში მოხდა, როდესაც ცენტრში უამარავი ხალხი იმყოფებოდა. იგორის თქმით, ხანძარს 200-დან 350-მდე ადამიანი ემსხვერპლა, ამის მიზეზი კი კინოდარბაზების დაკეტილი კარები გახდა, რის გამოც ადამიანებმა იქიდან თავის დაღწევა ვერ შეძლეს. ვოსტრიკოვის თქმით, ხანძრის დროს ადამიანები 3 კინოდარბაზში იმყოფებოდნენ და მხოლოდ ერთიდან შეძლეს თავის დაღწევა.
როგორც იგორი ამბობს, ხანძრისას მას კინოთეატრიდან დაურეკეს და შველა ითხოვეს. ისინი მაშინათვე ცენტრისკენ გაიქცნენ, მაგრამ დახმარება ვერ შეძლეს და მხოლოდ გარედან უყურებდნენ ცეცხლმოკიდებულ შენობას. რამდენიმე საათის განმავლობაში მათთან ოფიციალური სამსახურის არცერთი წარმომადგენელი არ გამოჩენილა. შეგახსენებთ, ოფიციალური ინფორმაციით, 25 მარტს, რუსეთის ქალაქ კამეროვოში სავაჭრო-გასართობ ცენტრში გაჩენილი ხანძრის შედეგად 64 ადამიანი დაიღუპა. დაშავებულია ათეულობით ადამიანი. დამწვარ შენობაში ადამიანების ძებნის ოპერაცია ისევ გრძელდება. სამართალდამცავების განცხადებით, ზოგიერთი დაღუპული ისეთ მდგომარეობაშია, რომ მათ ამოსაცნობად გენეტიკური ანალიზის გაკეთება გახდება საჭირო. პოლიციის განმარტებით, ხანძრის დროს, შენობაში სიგნალიზაცია არ ჩაირთო და დროულად არ განხორციელდა ევაკუაცია. კემეროვოში 3 დღიანი გლოვა გამოცხადდა. 27, 28 და 29 მარტს ხანძრის შედეგად დაღუპულებს იგლოვებენ. გამოძიების ფარგლებში უკვე დაკავებულია 5 ადამიანი. მათ შორის ერთი სავაჭრო ცენტრის დაცვის წევრია, რომელმაც ხანძრის დროს სიგნალიზაცია გამორთვა ედება ბრალად.