სწავლების დაგეგმვის კურსი

საქართველოსა და კანადის თავდაცვის სამინისტროებს შორის არსებული სამხედრო თანამშრომლობის პროგრამის ფარგლებში „სწავლების დაგეგმარების კურსი“ იმართება. დღეს სასტუმრო „ქორთიარდ მარიოტში“ სემინარი გენერალური შტაბის J-5 სტრატეგიული დაგეგმვის დეპარტამენტის, საერთაშორისო სამხედრო თანამშრომლობის სამმართველოს უფროსმა, პოლკოვნიკმა ლეონიდე სიხარულიძემ გახსნა, მის მნიშვნელობაზე ისაუბრა, მონაწილეებს წარმატებები უსურვა და კანადურ მხარეს მხარდაჭერისთვის მადლობა გადაუხადა.
სწავლების დაგეგმარების კურსში სხვადასხვა ქვეყნიდან - საქართველოდან, მაკედონიიდან, უკრაინიდან, ლიტვიდან, მონტენეგროდან, სერბეთიდან, ბოსნია და ჰერცეგოვინადან 40 სამხედრო მოსამსახურე მონაწილეობს, რომლებიც სწავლებების დაგეგმვისა და განხორციელების პროცესში არიან ჩართულები. ქართული მხრიდან სემინარზე სამხედრო პირები ნატო-საქართველოს წვრთნებისა და შეფასების ერთობლივი ცენტრიდან (JTEC), სერჟანტთა მომზადების ცენტრიდან და გენერალური შტაბის J-3 ოპერატიული დაგეგმვის დეპარტამენტიდან არიან წარმოდგენილები.
ტრენინგის მიზანს მსმენელებისთვის ეროვნული და საერთაშორისო მასშტაბის სამხედრო სწავლების ორგანიზების პროცესში ცნობიერების ამაღლება, საჭირო მეთოდების გაცნობა და უნარების დახვეწა წარმოადგენს.
ათდღიანი თეორიული კურსის განმავლობაში ქართველი, კანადელი, უკრაინელი და მაკედონელი ინსტრუქტორები მონაწილეებს გამოცდილებას გაუზიარებენ და სხვადასხვა მნიშვნელოვან ინფორმაციას მიაწვდიან.
საქართველო მესამედ მასპინძლობს სემინარს სწავლების დაგეგმვასთან დაკავშირებით, რომელიც კანადის თავდაცვის სამინისტროს ორგანიზებითა და საქართველოს თავდაცვის სამინისტროს მხარდაჭერით ტარდება.