შინაგან საქმეთა მინისტრი გიორგი გახარია, პირველ მოადგილესთან - კახაბერ საბანაძესთან და მოადგილესთან - მერაბ მალანიასთან ერთად, შინაგან საქმეთა სამინისტროს განსაკუთრებულ დავალებათა დეპარტამენტის ერგნეთის საგუშაგოს ეწვია. გიორგი გახარია საგუშაგოზე მომსახურე შიდა ქართლის სამხარეო განსაკუთრებულ დავალებათა სამმართველოს და შიდა ქართლის პოლიციის დეპარტამენტის თანამშრომლებს შეხვდა და ყოველდღიური საქმიანობის შესახებ გაესაუბრა. მინისტრმა ერგნეთის საგუშაგო დაათვალიერა და ადგილობრივ მოსამსახურეთა სამუშაო და საცხოვრებელ პირობებს გაეცნო. გიორგი გახარიამ განსაკუთრებულ დავალებათა დეპარტამენტის შიდა ქართლის სამხარეო განსაკუთრებულ დავალებათა სამმართველოს კარალეთის ბაზაც მოინახულა. შინაგან საქმეთა მინისტრს ბაზის ტერიტორიაზე განსაკუთრებულ დავალებათა დეპარტამენტის ხელმძღვანელები დახვდნენ. გიორგი გახარიამ შიდა ქართლის სამხარეო განსაკუთრებულ დავალებათა სამმართველო დაათვალიერა და პირად შემადგენლობას შეხვდა. ბოლო პერიოდში, ევროკავშირის წინაშე აღებული ვალდებულებებისა და მიმდინარე რეფორმების ფარგლებში, შინაგან საქმეთა სამინისტროს განსაკუთრებულ დავალებათა დეპარტამენტის თანამშრომელთა უნიფორმის, ტექნიკისა და აღჭურვილობის რებრენდინგი განხორციელდა, ასევე, მოხდა საგუშაგოების და საცხოვრებელი შენობების რეაბილიტაცია.