შეხვედრა სასჯელაღსრულებით დაწესებულებაში.
ე.წ. მატროსოვის ციხეში ადვოკატმა ვანო მერაბიშვილი მოინახულა. საუბარი ვადაზე ადრე გათავისუფლების საკითხს შეეხო.
შინაგან საქმეთა ყოფილი მინისტრის ადვოკატი აცხადებს, რომ მერაბიშვილმა სასჯელის ორი მესამედი უკვე მოიხადა და შესაბამისად, მასზე ვრცელდება ვადაზე ადრე გათავისუფლების მექანიზმი. თუმცა, მისივე თქმით, მერაბიშვილს შესაბამისი ცნობა ჯერ არ მიუღია. ადვოკატი აცხადებს, რომ შესაბამისი კომისია ვალდებულია მერაბიშვილის საკითხი განიხილოს, მსჯავრდებულის მიმართვის გარეშეც.
კეთდება პოლიტიკური განცხადებებიც. 28 ნოემბერს ელოდება ოთარ კახიძე. საპარლამენტო უმცირესობის წევრის თქმით, 28 ნოემბერს მერაბიშვილის საქმეზე გადაწყვეტილებას გამოაცხადებს სტრასბურგის სასამართლო და ხელისუფლება ვალდებული იქნება მერაბიშვილი გაათავისუფლოს.
სასჯელის ამოწურვამდე მერაბიშვილის გათავისუფლებას გამორიცხავს იუსტიციის მინისტრი. თეა წულუკიანის განცხადებით, ადამიანის უფლებათა დაცვის ევროპული სასამართლოში მიმდინარე პროცესი მერაბიშვილის წინასწარ პატიმრობას ეხება.